Florjan Binajn e njohim si një prej aktorëve më të spikatur të “Portokalli”, ose si piktor që ka përfunduar studimet për artin pamor. Por ai e ka nisur duke bërë punë nga më të rëndomtat, që në moshën 8-vjeçare.
I ftuar sot tek “E Diell” bashkë me aktorin Ledio Lako, Flori tregoi disa nga punët e tij të para, të cilat kanë qenë nga më të ndryshmet.
Në një intervistë ku pyetjet ia bënin ata njëri- tjetrit, Ledio e pyeti Florin se cila ka qenë hera e fundit kur ka punuar pa pagesë.
Por, përgjigja e Florit zbuloi të shkuarën e panjohur si fatorino në furgon.
“Unë kam punuar që 8 vjeç.”, e nisi Flori, “Kam filluar të shes piktura, apo dhe punë të ndryshme. Kam punuar ‘security’ nëpër panaire, kam punuar tek dyqani i babit tim, e ndihmoja pa lekë, kam punuar edhe fatorino furgoni në unazë.”
Binaj është prej vitesh i martuar me Sadina Allën, me të cilën ka dy fëmijë.
Ata janë njohur gjatë viteve si nxënës në liceun artistik “Jordan Misja” ku studonin të dy për pikturë.
Në 2016-ën, Florjan Binaj prezantoi ekspozitën e tij të parë, “Paralel”.
Këto javë, ai po promovon bashkë me aktorin Ledio Lako shfaqjen “Tango”.
