Ministrja e Kulturës, Mirela Kumbaro vetëm pak ditë më parë publikoi në faqen e saj në Facebook një video ku promovonte zonat dhe monumentet historiko-kulturore në Shqipëri. Kjo video ishte shoqëruar nga kolona zanore e Himnit Kombëtar, por në një version të ri.
Pikërisht ky ndyshim ka ngjallur reagimin e ashpër të gazetares Ida Nurçe dhe deputetes Orjola Pampuri. Nëpërmjet një postimi në Facebook, Orjola e ka quajtur këtë ndryshim një përdhosje të Himnit Kombëtar.
“Kur vendosin të përdhosin edhe himnin…..
Kur kolonë zanore e turizmit Shqiptar vendoset himni i përpunuar, ashtu sikurse është edhe vetë imazhi i turizmit sipas show-t mediatik, ky mund të konsiderohet mirëfilli kulmi i një çrregullimi delirant. Himni është simbol i shenjtë e i paprekshëm i një kombi e nuk mund të përdoret si pëlhurë për rrënojat e turizmit shqiptar, i cili nën dorën e uzurpuesve të rilindjes vetëm u rrënua. Cilin turizëm po promovoni atë malor ku nuk ndërtuat asnjë rrugë, atë bregdetar rrugët e të cilit u ndërtuan në 8 vitet e qeverisë se Dr. Berishës, Llogoranë ku me orë të tëra mungon energjia, kur vizitohet nga qindra turistë, bregdetin të cilin e kanë uzurpuar klientët e kësaj qeverie, Butrintin, pasuri kombëtare, i mbrojtur nga UNESCO, të cilin e rrënoni me dorë të hekurt duke ndërtuar në të, lëshoni leje ndërtimi pa kriter e pa asnjë plan, e gjitha kjo në shërbim të miqve e klientëve. Bëni marrëveshje për detin, e çka mund të mbetet tjetër nga turizmi në Shqipëri? Asgjë…….Himni i përpunuar e turizmi i rrënuar, një miksim amatorësh dashakeq”, shkruan deputetja Pampuri.
Ndërsa akoma më i ashpër ishte komenti i gazetares Ida Nurçe, e cila thotë se ka ngelur e shokuar nga ky veprim.
“Po ku të…e gjete të drejtën t’i bësh këto ndryshime moj e dashur ministre, kuuu? Po kush dreqin të vuri ministre kulture ty moj…, që nuk di as tri rreshta nga historia e kombit tonë?! Po si mundet të na i reklamosh vendet historike të Shqipërisë, kur je ti ajo që nuk e pengon ruajtjen gjallë të vlerave historike të këtij vendi”, shkruan e irrituar gazetarja, Ida Nurçe.
