Nëse vuani nga ankthi , lajmi i mirë është se mund të jetë një shenjë se keni inteligjencë mbi mesataren. Ky është përfundimi në të cilin kanë arritur studiuesit kanadezë nga Universiteti i Ontarios, pas një studimi që kanë kryer mbi 100 studentë.
Pjesëmarrësve iu kërkua të zgjidhnin pohime që shprehnin veten, të tilla si: “ Unë jam vazhdimisht i shqetësuar për diçka.” Siç vunë re shkencëtarët, ata që kishin zgjedhur më shumë fraza që shprehnin ankth patën rezultate më të larta në testet e inteligjencës verbale .
Sigurisht, ky nuk është studimi i vetëm i kryer mbi këtë temë. Kur psikologët në institucionin arsimor izraelit Qendra Ndërdisiplinore Herzliya i nënshtruan 80 studentë testeve të ndryshme, ata zbuluan se më të shqetësuarit ishin gjithashtu më të aftët për të zgjidhur problemet teknike që u paraqiteshin.
Në të njëjtën kohë, një psikiatër, Jeremy Coplan, vërejti se ata që vuajnë nga çrregullimi i ankthit të përgjithësuar kanë një IQ më të lartë se ata që përjetojnë ankth të lehtë.
Disa shpjegime të dhëna nga ekspertët? Që aftësia e një personi inteligjent për të shqyrtuar një situatë nga perspektiva të ndryshme shoqërohet me nivele më të larta shqetësimi dhe ankthi. Ose, nga ana tjetër, vetë ankthi mund të na shtyjë të përpiqemi më shumë në fushat që na interesojnë, duke kultivuar kështu inteligjencën tonë. Me fjalë të tjera, duket se është një marrëdhënie dypalëshe.
Sigurisht, ka përjashtime: një studim tregoi se stresi mund të ndikojë negativisht në IQ sepse, thjesht, sipas psikologut Robert Epstein, “kur dikush vuan nga stresi, ai nuk mund të mendojë shumë qartë”.
Por, ai beson se përjashtimet nuk e hedhin poshtë përfundimin e përgjithshëm. Në fakt, disa nga mendimtarët më të mëdhenj të historisë, si Çarls Darvini, Abraham Lincoln dhe Nikola Tesla, mendohet se kanë vuajtur nga çrregullime ankthi.
