Java e Modës në New York nisi në mënyrë të bujshme me Tom Ford dy ditë më parë, për të vazhduar me Calvin Klein dhe tashmë me Brandon Maxwell.
Shtëpia e modës përdori xhinsin për herë të parë për të shfaqur stilin klasik amerikan me ngjyra të ndezura. Modelet më të mira të momentit nuk munguan në pasarelë, si Gigi dhe Bella Hadid, Karlie Kloss, Taylor Hill dhe Joan Smalls.
Për veshjet e ditës, modelet ecën nën tingujt e Britney Spears dhe Destiny’s Child veshur me xhinse të gjera me bel të lartë dhe bluza me jaka të ngritura gjysmë golf ose të ndërthurura si lak. Materialet e buta përcjellin ndjesinë e klasikes ndërsa xhinsi e bën të përditshme veshjen.
“Pantallonat tona klasike janë ato që shiten më shumë. Në prerje të drejtë ose të gjera në fund. Mora ato lloj pantallonash dhe i bëra xhins. E kam pasur gjithmonë të vështirë të ktheja një veshje klasike në të përditshme, po kësaj here ishte e lehtë,” tha Maxwell.
Ndërsa për paraqitjet e mbrëmjes, Maxwell i qëndroi besnik stilit të tij elegant me bele të rrudhosura dhe e pasuroi koleksionin me fustane madhështorë në pastele të ëmbla dhe printe leopardi në ngjyrë të çelët.
I njohur për stilimet në të zezë dhe të bardhë të akullt, ai surprizoi me një paletë të pasur ngjyrash në: rozë, të kuqe, çiklaminë, mente, blu, jeshile dhe portokalli.
