Teksa na ndajnë vetëm pak javë nga hapja e shkollave pas vendimit të Ministrisë së Arsimit, është e nevojshme të sqarojmë diçka njëherë e mirë:
Fëmijët jo vetëm që nuk janë imunë nga COVID-19 por njihen edhe si “bartës të heshtur të virusit”.
Sipas një studimi të fundit nga një grup studiuesish ekspertë në Spitalin e Përgjithshëm të Masaçusets, fëmijët e moshës pediatrike kanë një ngarkesë virale shumë më e lartë se të rriturit në kujdes intensiv.
Edhe pse ata nuk zhvillojnë simptomat e infeksionit, kanë më pak receptorë për patogjenin Sars-CoV-2 (proteina tani e njohur ACE2), por kanë një numër të konsiderueshëm të grimcave virale Covid.
“Fëmijët nuk janë imunë nga ky infeksion – tha Alessio Fasano, pediatër në Shkollën Mjekësore Harvard dhe bashkëautor i studimit – dhe ne nuk mund t’i përjashtojmë ata si bartës asimptomatikë të virusit që mund ta përhapin infeksionin në shtëpi ose në shkollë”.
Kosova e sheh me pesimizëm hapjen e shkollave
Dhe ndonëse Ministria e Arsimit në vend vendosi për hapjen e shkollave, në Kosovë kjo çështje po shihet me mjaft shqetësim. Për hapjen e mundshme të shkollave për vitin e ri mësimor në Prishtinë, kryebashkiaku Shpend Ahmeti ka folur me pesimizëm, duke treguar se në disa vende të botës “po përhapet virusi” pikërisht prej hapjes së shkollave.
“Si kryetar i Prishtinës e kam ngritur çështjen që nuk e kemi sasinë më të vogël të informatave për shkollat në mënyrë që të kemi vendim se a me i hapë apo jo. Duhet t’i marrim këto vendime me kujdes. Duhet ta shohim mënyrën sesi duhet të ecim përpara. Të gjitha shtetet po tregojnë se me hapjen e shkollave, ato storiet se nuk përhapet te fëmijët, natyrisht që nuk janë të vërteta sepse në çdo shtet po shihet se përhapet. Ndoshta e kalojnë më lehtë, por janë bartës të virusit që mund t’i infektojnë edhe të tjerët”, tha Ahmeti.
Ai theksoi se “mbetet të mbajmë edhe takime tjera” për të vendosur lidhur me shumë çështje që janë diskutuar.
Si përfundim, është e drejtë të mendojmë se fëmijët janë më ngjitës të Covid, krahasuar me të rriturit?
“Me siguri fëmijët, pikërisht sepse kanë më pak receptorë, sëmuren më pak se të rriturit – shpjegon Gianvincenzo Zuccotti, president i Fakultetit të Mjekësisë në Universitetin Shtetëror dhe drejtor i departamentit të Pediatrisë dhe Ndihmës së Parë në spitalin Buzzi në Milano, – por nuk mund të thuhet se ata nuk janë në gjendje të transmetojnë infeksionin sepse një deklarim i tillë do të shkonte në drejtim të kundërt me atë që ndodh çdo vit gjatë sezonit të gripit, kur janë pikërisht të vegjlit që janë më ngjitës”.
Shembujt nga bota që duhet t’i studiojmë
Sado që na duhet të pranojmë se mësimi në shkollë është shumë më efektiv se ai online, çfarë do të ndodhë nëse një person nga stafi i shkollës rezulton i infektuar? Ministrja e Arsimit u shpreh se nxënësit do t’i rikthehen mësimit online në rast se do të mbyllet një ose më shumë shkolla. Mbyllja e shkollës do të vijë në rastet kur një nga anëtarët e stafit, ose fëmijë të jetë infektuar me COVID-19. Por a mund ta marrim përsipër një risk të tillë?
Të njëjtin veprim ndërmori edhe qeveria e Izraelit, ku rihapja e shpejtë e shkollës çoi në një kolaps në të gjithë vendin. Një shkollë pati 154 nxënës dhe 26 anëtarë të stafit pozitivë me koronavirus, pa marrë parasysh familjet e tyre. Një muaj pas rihapjes, gati gjysma e infeksioneve të reja të vendit mendohej se kishin origjinën nga shkollat.
Nuk duhet të harojmë se hapja e shkollave mund të rrezikojë mijëra mësues, kuzhinierë, pastrues, nxënës dhe familjet e tyre bashkë me gjyshërit e moshuar që janë grupmosha më e prekur nga virusi.
/Iconstyle.al
