Bordi Kombëtar i Menaxhimit të Hidrokarburëve ka vendosur ditën e sotme se çmimi i naftës do të shkojë nga 223 lekë në 217 lekë për liter.
Në protestën e sotme, protestuesit kërkuan nga Qeveria marrjen e masave të menjëhershme për stabilizimin e çmimeve dhe shmangien e abuzimeve në treg.
Një kërkesë tjetër e tyre ishte lirimi i disa protestuesve të ndaluar gjatë tre ditëve të mëparshme.
Ndërkohë protesta ka patur edhe në rrethe. Ndonëse kryeministri i Shqipërisë, Edi Rama, njoftoi se sot ka nisur puna e bordit të kontrollit të furnizuesve të naftës dhe Qeveria është mbledhur për te miratuar paktën anti-krizë, qytetarët janë mbledhur sërish.
Protestës nuk i janë bashkuar vetëm personazhet e njohur, por edhe personat me aftësi të kufizuara.
Revolta e qytetarëve erdhi pas mëngjesit të 7 marsit, atëherë kur çmimet e produkteve të ndryshme, në supermarkete, apo shërbime të tjera, si transporti rrugor, pësuan një rritje drastike.
Çmimi i naftës, brenda 24 orëve, u kushtoi atyre 30-35 lekë më shumë se një ditë më parë.
Nga ana tjetër, aktivistët, nëpërmjet kanaleve online, iniciuan grumbullimet e para.
Kështu pasditja e së mërkurës i gjeti qytetarët poshtë derës së “drejtuesit të qeverisë”, si për t’i kërkuar “llogari” për çdo qindarkë të shpenzuar më tepër.
