Shënohet viktima e parë nga trazirat në SHBA. Një grua që u qëllua brenda ndërtesës së Kongresit ndërroi jetë në spital.
“Po, gruaja që u qëllua brenda në Kapitol ndërroi jetë një spital të zonës”, tha një zyrtar amerikan. Ajo nuk është identifikuar ende nga zyrtarët, por policia më herët tha se ajo ishte civile.
Prej disa orësh SHBA po përballet me momente të paprecedenta. Si asnjëherë më parë në historinë e SHBA-së, Kongresi u sulmua ditën e sotme në momentin që ishte mbledhur për të certifikuar votimin e Kolegjit Zgjedhor që i jep dritën jeshile Joe Biden në krye të Shtëpisë së Bardhë.
Ndërkohë, CNN shkruan se zv/presidenti Mike Pence është evakuuar nga ndërtesa ku ndodhej për Sesionin e Përbashkët të Kongresit. Po ashtu, raportohet se votimi për certifikimin e votave elektorale është pezulluar, pasi protestuesit u futën në ndërtesë.
Ndërkohë, pamje të tjera të marra nga brenda ndërtesës tregojnë përplasjen fizike mes protestuesve dhe forcave të policisë. Deri më tani, dihet që një grua është plagosur rëndë me armë zjarri dhe po merr kujdes shëndetësor. Ndërsa turmat janë duke u përplasur me forcat policore në Kapitol, Donald Trump u ka bërë sërish thirrje mbështetësve të tij që të ruajnë qetësinë.
Nga ana tjetër, Presidenti i zgjedhur i SHBA-ve, Joe Biden ka mbajtur një fjalim televiziv në lidhje me dhunën dhe “pushtimin” që i është bërë ndërtesës së Kapitolit nga mbështetësit e Donald Trump.
Në fjalën e tij, Biden ka dënuar dhunën në Kapitol ndërsa është shprehur se kjo ngjarje është ndryshe nga çdo gjë që është parë në kohët moderne të vendit. Po ashtu, presidenti i zgjedhur shprehet se kjo që po ndodh në Kapitol nuk është Amerika e vërtetë, por shtoi ai, bëhet fjalë për një grup ekstremistësh.
“Në këtë orë, demokracia jonë është nën një sulm të paprecedentë. Kjo është ndryshe nga çdo gjë që kemi parë në kohët moderne. Një sulm ndaj kështjellës së lirisë, vetë Kapitolit. Një sulm ndaj përfaqësuesve të popullit dhe policisë së Capitol Hill, të betuar për t’i mbrojtur ata. Dhe nëpunësit publikë që punojnë në zemër të Republikës sonë … Më lejoni të jem shumë i qartë. Skenat e kaosit në Kapitol nuk pasqyrojnë një Amerikë të vërtetë. Nuk përfaqëson atë që jemi. Ajo që po shohim është një numër i vogël ekstermistësh kushtuar paligjshmërisë. Ky nuk është mospajtim. Është kaos…Dhe duhet të mbarojë tani. ”
