Protestat në Kazakistan vijojnë që prej ditës së djeshme duke shkaktuar mjaft rrëmuja në vend. Trazirat kanë shkaktuar vdekjen e 12 personave dhe plagosjen e më shumë se 350 të tjerëve. Gjatë natës, ushtria doli në rrugë dhe ndërmori një operacion kundër të gjithë atyre që plaçkitën qytetin dhe shkatërruan pronat.
Protestat nisën me rritjen e çmimit të gazit dhe karburanteve, por edhe të artikujve ushqimorë. Policia tha se godinat e administratës dhe policisë në Almaty ishin objektivi i sulmit dhe se pati një shkëmbim zjarri mes sulmuesve dhe pjesëtarëve të forcave të sigurisë dhe ushtrisë në vend.
Paqëruajtësit i përkasin një trupe të Organizatës së Traktatit të Sigurisë Kolektive (CSTO), e cila përbëhet nga vende aleate të ish-Bashkimit Sovjetik. Presidenti i Kazakistanit Kassym-Jomart Tokayev i kërkoi ndihmë më herët aleancës ushtarake mes Rusisë, Bjellorusisë, Armenisë, Kazakistanit, Kirgistanit dhe Taxhikistanit.
Kryeministri armen, Nikol Pashinyan ishte ai që bëri njoftimin se trupat do të stacionohen në Kazakistan për një periudhë të shkurtër kohe, deri sat ë rikthehet rendi e qetësia, por nuk sqaroi ndërkohë sesa ushtarë do të dërgohen në vendin e trazuar.
Shtëpia e Bardhë dhe Organizata e Kombeve të Bashkuara u kërkuan autoriteteve të Kazakistanit të tregohen të përmbajtur në trajtimin e krizës. Washingtoni hodhi poshtë dhe ato që i quajti “pretendime të çmendura ruse” se pas demonstratave masive është dora amerikane duke i quajtur si “absolutisht të rreme dhe si pjesë e qartë e librit standard rus të dezinformimit”.
Kazakistani është trazuar që nga fillimi i vitit nga protesta, të cilat u përshkallëzuan të mërkurën në përleshje me policinë. Në vend u shpall gjendja e jashtëzakonshme pasi protestat për rritjen e çmimit të karburantit kaluan në përleshje dhe demonstruesit sulmuan ndërtesat qeveritare.
