Gratë naftëtare të ish-rafinerisë së Ballshit, hyjnë sot në ditën e dhjetë të grevës së urisë, në një kohë që gjendja shëndetësore e tyre është rënduar së tepërmi.
Edhe sot nga ambientet e grevës, ku qëndrojnë të ngujuara, ato i kanë lëshuar një apel të fortë kryeministrit Rama, i cili nuk po denjon që t’u japë një zgjidhje, me pretendimit se nuk mund të negociojë me “kërcënime”.
Ato janë shprehur njëzëri se ndihen keq dhe se stresi dhe heshtja e kryeministrit Edi Rama, po i vret.
“Po na vret stresi dhe heshtja e kryeministrit. Pagat janë të panegociueshme. Vetëm të vdekura dalin”,- shprehen grevistet e ngujuara në ambientet e brendshme të uzinës.
Mes të tjerash ajo kanë paralajmëruar edhe përshkallëzimin e mëtejshëm të situatës, ndërsa pohojnë se, po detyrohen që të marrin në greve edhe fëmijët e tyre.
“Mos na detyroni që të sjellim edhe fëmijët këtu. Do të vazhdojmë grevën e urisë. Që këtu dalim vetëm të vdekura”,- thanë të vendosura gratë greviste.
