Sot do të zhvillohet protesta e Partisë Demokratike. Raportohet se tubimi do të nisë në orën 19:00 dhe do të mbyllet në orën 21:00.
Pritet që Garda të shtojë sigurinë gjatë gjithë bulevardit “Dëshmorët e Kombit”.
Gjithashtu, mësohet se janë gati edhe autobotet me ujë.
Jo vetëm kaq por ambulanca do të ndodhet pikërisht në vendin ku edhe do të ndodhë tubimi.
Bulevardi “Dëshmorët e Kombit”, rruga “Gjergj Fishta”, bulevardi “Bajram Curri”, bulevardi Zhan D’Ark do të jenë të bllokuara.
Nga ana tjetër, Ambasada Amerikane në Tiranë ka publikuar një njoftim ku bën thirrje për qytetarët. Ambasada kërkon që qytetarët të jenë të kujdesshëm dhe thekson se protesta duhet të zhvillohet në mënyrë paqësore.
Njoftimi i Ambasadës Amerikane:
“Ditën e enjte, datë 07.07.2022, në orën 19:00, është planifikuar të zhvillohet një protestë përpara Kryeministrisë në Bulevardin Dëshmorët e Kombit. Këto protesta kanë potencialin të përhapen në rrugët përreth duke shkaktuar bllokime të trafikut, devijime dhe mbyllje të rrugëve. Qytetarët amerikanë këshillohen të shmangin tubimet e mëdha në qytet. Ndërsa shumë ngjarje të mëdha zhvillohen në mënyrë paqësore, disa situata mund të ndryshojnë shpejt dhe në mënyrë të paparashikueshme. Monitoroni mediat lokale dhe ndiqni udhëzimet e autoriteteve lokale të zbatimit të ligjit për informacionin më të fundit. Veprimet që duhen ndërmarrë: Shmangni tubimet e mëdha dhe çdo zonë ku demonstratat janë të pashmangshme ose në vazhdim. Jini të vetëdijshëm për rrethinën tuaj. Monitoroni mediat lokale për përditësime. Mbani një profil të ulët”.
