Nuk është e lehtë që të gjeni mënyrën unike për të bërë sot një propozim martesë. Por varet sa i guximshëm je?
Eri Rasmussen bëri një propozim për partneren me një arushë pelushi me një zemër të kuqe dhe një shkrim: “Amy, je me të vërtetë përtej botës! A do të martohesh me mua?”.
Ky do të ishte një propozim normal nëse do të zhvillohej në Tokë, por vendi i zgjedhur e bëri atë unik. Ai u lëshua në kufijtë e atmosferës me një balonë sondë.
Mbrapa arushit ndodhet një pamje e mrekullueshme e Tokës, ndërsa në plan të parë kartolina me propozimin.
Kjo sipërmarrje që përfundoi me një “po”, u mendua nga Erik Rasmussen, një i pasionuar për hapësirën që jeton në Oregon.
Ky djalosh me 500 dollarët që harxhoi për këtë mesazh, jo vetëm që pushtoi përgjithmonë zemrën e të dashurës së tij, por kontribuoi gjithashtu financiarisht në projektin “Earth to sky calculus”, nëpërmjet të cilit studentët kalifornianë lëshojnë balona sondë për të matur efektet e rrezatimit mbi atmosferën e Tokës dhe për të kërkuar forma të reja jete në zonën më ekstreme, atë të stratosferës.
