Pa nisur ende as themelet, “Alabbar” nis shitjen ‘në ajër’ të apartamenteve në projektin e Portit të Durrësit.
“Durrës Yatchs & Marina” bëri të ditur zyrtarisht në faqen e saj në Facebook se ka filluar shitjen e apartamenteve në datën 8 dhjetor.
Mjaftoi vetëm projekti në letër që në Durrës të nisnin shitjet e apartamenteve. Projekti do të realizohet nga marrëveshja mes qeverisë shqiptare dhe themeluesit të Emaar Group, Mohammed Alabbar.
Skema e ndërtimit të rezidencës në Durrës nuk ka ndryshim nga mënyra se si punojnë rëndomtë ndërtuesit shqiptarë. Pra ngrejnë katet e tjera të pallateve qiellgërvishtëse me paratë e fituara paraprakisht nga shitja e apartamenteve.
Në të tilla raste para se të investojmë në një pronë e rëndësishme është të dihet edhe e shkuara e ndërtuesit.
Duke njohur të shkuarën e investitorit, blerësi kupton nëse projekti do dështojë në të ardhmen apo jo.
Pikërisht për këtë, Mohammed Alabbar u prezantua si themelues dhe drejtues i Emaar Group, megjithëse kompania nuk ekziston askund në dokumentat e investimit në Durrës. Emri i kompanisë ishte garancia e investimit.
Burj Khalifa në Dubai është vepra që shenjon emrin e kësaj kompanie, por investimet e tjera jashtë vendit që do të përmendim më poshtë tregojnë shumë për këtë kompani.
Një media kroate, në nëntor të këtij viti rreshtoi disa nga dështimet e Emaar. Një shkrim i gazetares Marja Bajaj, i botuar në www.24sata.hr dëshmon se emri i kompanisë Emaar nuk është garanci e suksesit dhe se skema që aplikojnë arabët për ndërtimet mund të sjellë surpriza të pakëndshme për blerësit.
Shkrimi sjell projektin e Emaar në qytetin Indian të Mohali, në provincën e Punjab në Indi. Emaar bashkëpunoi me një kompani vendase dhe sipas shkrimit firmosi disa “kontrata të dyshimta” me autoritetet vendase për një rezidencë me 1670 vila.
Shkak për parregullsitë u bënë mosmarrëveshjet e kompanive vendase të ndërtimit që bashkëpunuan me arabët. Por gazetarja sjell edhe një rast tjetër kur sheikët kanë dështuar në Indi. Bëhet fjalë për një projekt të vitit 2010 që kishte të bënte me fshatin sportiv për lojërat e Komonuelthit, i cili nuk u përfundua kurrë.
Dështime të Emaar janë shënjuar edhe në Pakistan.
Ndërsa në vendin tonë për t’u dukur kompani serioze dhe e besueshme për blerësit, Emaar ka blerë edhe një zyrë tek stadiumi “Air Albania”.
