Prej më shumë se 20 ditësh banorët e Astirit vazhdojnë protestën lidhur me prishjen e banesave dhe bizneseve në zonën e “Unazës së Re”.
Ndërsa opozita i është bashkuar shpesh protestës së qytetarëve, ditën e sotme Policia e Tiranës procedoi penalisht kreun e PD-së, Lulzim Basha bashkë me dy deputetë të tjerë.
Sipas njoftimit të policisë, procedimi ka nisur për shkak të protestës që degradoi në dhunë mes qytetarëve dhe policisë më 23 nëntor.
Të proceduar penalisht janë edhe dy deputetët demokratë, Ervin Salianji e Klevis Balliu.
Ky i fundit u përfol se ishte në një lidhje me moderatoren Ilda Bejleri, por dyshohet se dyshja nuk është më bashkë prej pak kohësh.
Ndaj të proceduarave rëndon akuza për tre vepra penale, “Organizim dhe pjesëmarrje në grumbullime të paligjshme”, “Prishje e qetësisë publike” dhe “Pengim i qarkullimit të mjeteve”.
“Më datë 23.11.2018, u referuan materialet në Prokurorinë pranë Gjykatës së Shkallës së Parë Tiranë, për shtetasit L. B., E. S., K. B., F. N., E. A., G. P., A. B., L. P., Sh. S., G. S., E. F., B. Gj., M. F., L. K., B. Gj., vjeç 44, 30, 29, 46, 45, 55, 44, 51, 45, 49, 36, 51, 61, 51 e 32, banues në Tiranë për veprat penale të parashikuar nga nenet 262, 274 e 293 të Kodit Penal”, thuhet në njoftimin e policisë.
