Një tërmet i fuqishëm “shkundi” të gjithë Tiranën duke përhapur panik tek banorët e kryeqytetit dhe zonave përreth që u prekën. Tërmeti me intesitet 6 ballë dhe magniturë 5.1 ballë e shkallës Rihter, ka pasur epiqendër fshatin Hamallaj në qytetin e Durrësit, bën të ditur Ministria e Mbrotjes. Sipas specialistëve, lëkundja e fortë u pasua nga 22 pasgoditje më të lehta. Deri tani nuk ka asnjë raportim për dëme materiale apo në njerëz.
Por a do të ketë një tjetër tërmet në kryeqytet dhe në zonat përreth?
Rrapo Ormeni, Sizmolog pranë departamentit të Sizmologjisë në IGJEUM është shprehur për “News 24”, se do të ketë lëkundje të tjera, por do të kenë magniturë të vogël.
“Tërmeti ishte rreth 30 km në veriperëndim të Tiranës, 18 km në verilindje të Durrësit, 6 ballë me magniturë 5.1 e shkallës Rihter. Tërmeti është shoqëruar edhe me një seri lëkundjes, me 22 të tilla. Këto janë tërmet të nivelit mesatar. Ato shoqërohen me pasgoditje dhe lëkundje të tjera më të vogla, pasi është prishur ekuilibri. Ky çlirim energjie, pritet të sjellë lëkundje të vogla” – u shpreh Ormeni.
