Qëkurse Siria u përfshi nga një luftë e përgjakshme në vitin 2011, e gjithë bota mbarë është përballur me një krizë të pashembullt refugjatësh. Në tentativë për të mbijetuar nga konflikti që nuk ka kursyer as jetët e mijëra fëmijëve, sirianët u drejtuan shteteve europiane, që nuk ishin aspak të përgatitura për një situatë të tillë. Me mijëra humbën jetën në detin Mesdhe në përpjekje për të gjetur shpëtim në Europë, ndërsa ata që ia dolën, u strehuan në kampe të ngritura në Itali, Gjermani , Greqi, Francë etj. Mirëpo, duket se në pamundësi për ta përballuar më gjatë këtë situatë, Bashkimi Europian ka nisur të kërkojë vende alternative për ngritjen e kampeve të refugjatëve dhe mesa duket, në hartë është dhe Shqipëria.
Një gjë e tillë është diskutuar së fundmi në një reportazh të rrjetit televiziv gjerman “ZDF”, ku vetë zëvendës ministri i Brendshëm Julian Hodaj shprehet se Shqipëria i ka kapacitetet e duhura për të strehuar refugjatët sirianë.
“Shqipëria ka kapacitet të mbajë deri në 600 mijë refugjatë. E ka treguar këtë dhe në të kaluarën, gjatë luftës së Kosovës.”-shprehet Hodaj në reportazhin e “ZDF”. Sakaq, në reportazh gjithashtu thuhet se sipas qeverisë austriake, në Shqipëri mund të krijohet një qendër refugjatësh për të gjithë BE-në dhe se shteti shqiptar nuk është kundër diçkaje të tillë, duke qenë se shpreson për mbështetje financiare dhe anëtarësim në BE.
Të njëjtën gjë ka thënë dhe kryeministri bullgar rreth një javë më parë, i cili më keq akoma, u shpreh se në Shqipëri do të ndërtohet një qendër koordinimi për luftëtarët që kthehen nga ISIS në territorin e Ballkanit. Po, po, e kuptuat mirë! Praktikisht bota po bën planet e veta për të sjellë në Shqipëri refugjatë +/- disa terroristë të ISIS dhe ne nuk dimë asgjë! Madje zëvendës minsitri shprehet se “i kemi kapacitetet”. Por le të shohim disa nga arsyet përse me shumë mundësi ne “nuk i kemi aspak kapacitetet”.
Së pari, nëse do të marrim si krahasim situatën e luftës së Kosovës… le të themi që më mirë do të ishte të mos e merrnim fare. Lufta e Kosovës është një histori tërësisht e ndryshme me atë që po ndodh në Siri, veçanërisht për kulturat tepër të ndryshme midis këtyre popujve dhe me shumë gjasa, pjesa më e madhe e shqiptarëve janë gati ta çojnë në djall anëtarësimin në BE nëse do t’u propozohej të strehonin dikë që mund ose jo të ketë qenë një terrorist i ISIS. Së dyti, e keni parasysh Gjermaninë? Gjermaninë me superfuqitë e saj ekonomike dhe gjithë perfeksionizmin që e karakteriozon si shtet. Pikërisht atë. Politika e Angela Merkel për refugjatët e përmbledhur me shprehjen “Do t’ja dalim, por jo vetëm”, thuajse i kushtoi mandatin kancelares asokohe dhe me gjithë organizmin e jashtëzakonshëm (dhe të kushtueshëm) të shtetit gjerman për të integruar në shoqëri dhe ekonomi refugjatët, e gjithë kjo situatë, edhe 4 vite më pas, vijon të quhet “krizë”. Së fundmi, qeveria gjermane po shqyrton taktika të reja riintegrimi për të ulur kriminalitetin e lidhur pikërisht me refugjatët.
Por le të lëmë Gjermaninë dhe të shohim Greqinë që ndoshta i përafrohet disi më shumë kapaciteteve të Shqipërisë. Që prej vitit 2015 kur Greqia hapi dyert ndaj refugjatëve, vendi ka hasur një rritje drastike në kriminalitet. Vetëm pak kohë më parë, një dokumentar i “Russia Today” zbuloi sesi sheshi i famshëm “Omonia” në Athinë ishte shndërruar në një vatër kriminaliteti, me dhjetra të rinj sirianë që prostituoheshin për 10 euro dhe konsumonin lirisht drogë.
Tani, imagjinojeni këtë panoramë në një prej qyteteve shqiptare. Situata në Greqi ka dëshmuar më së miri se me gjithë ndihmat e marra nga Bashkimi Europian, sistemimi dhe integrimi i refugjatëve sirianë ka dështuar. Ndaj, çfarë na bën të mendojmë se ne mund ta përballojmë më mirë një gjë të tillë? Ju si mendoni?
