Pedagogë, prindër dhe studentë, kanë dalë në protestë përpara Fakultetit të Ekonomikut pas sulmit ndaj 3 studentëve ditën e djeshme.
Qëllimi i protestës ishte zbardhja e ngjarjes së rëndë dhe vënia para drejtësisë të autorëve.
Pedagogu Rezart Prifti tha se siguria në institucione është zero dhe jemi në pikë “më jep notën se të çaj gojën”. Më tej ai shtoi se personat e panjohur që u futën në mes të leksionit, nuk e kanë nisur fare fakultetin.
“Ne jemi njerëz të penës, jo të pistoletës. Jemi pak a shumë në situatën ‘më jep notën, se të çaj gojën’. Kjo është një çështje e shtetit, jo thjesht e institucioneve. Siguria në institucione është zero. Studentët kanë qenë viti i tretë Bachelor, ndërsa ata horrat kanë qenë moshë më të madhe. Ata nuk e kanë nisur fare fakultetin. Kjo është një situatë banale. Organizimi i sotëm ishte spontan dhe unë mendoj se duhet të vazhdojë, derisa të dalin horrat, sepse gjashtë vajza rrinë aty, pasi kanë frikë të dalin. Vajzat fatmirësisht nuk kanë rënë pre e dhunës”, tha pedagogu Prifti.
Pasditen e djeshme dy persona të panjohur u futën në leksion me studentet e Ekonomikut dhe filluat të ngacmonin vajzat.
Djemtë e klasës kanë reaguar duke i përzënë jashtë, ndërsa pedagogia ka ndërprerë leksionin.
Por jashtë klasës, grupi i të rinjve kishte thirrur shokët, të cilët më pas dhunuan fizikisht djemtë, duke u shkaktuar disa fraktura.
