Presidenti austriak Alexander Van der Bellen ka thyer rregullat e karantinës, pasi është kapur duke darkuar me bashkëshorten e tij dhe një mik, në restorantin e njohur në pronësi të një shqiptari në Vjenë.
Sipas mediave austriake, restoranti në atë kohë ishte i mbyllur, por ata kishin vazhduar edhe për më shumë se një orë të qëndronin në taracën e tij.
Pas këtij veprimi, kreu i Austrisë ka kërkuar falje publike dhe madje ka mbrojtur edhe të zotin e restorantit, i cili rrezikon 30 mijë euro gjobë sipas rregullores.
“E humbëm kohën duke biseduar dhe fatkeqësisht e kaluam orarin e lejuar. Më vjen keq, ishte një gabim. Nëse restoranti do të marrë ndonjë gjobë, unë do të qëndroj prapa kësaj dhe do të marr përgjegjësitë e mia”, ka shkruar ndër të tjera presidenti Van der Bellen.
Restoranti “Sole” është pronë e gastronomit të njohur shqiptar Aki Nuredini, prej vitit 1983 dhe gjendet në një nga lagjet më të frekuentuara të Vjenës.
Edhe pse është shqiptar me origjinë nga Maqedonia e Veriut, ai njihet më shumë si “italiani” për shkak të restorantit të tij që mban emrin italian “Sole”. Aty drekojnë politikanë austriakë të nivelit më të lartë dhe Nuredini është dekoruar edhe nga qeveria e Austrisë.
