Rasti i tij preku miliona zemra në Shqipëri dhe Itali, por më në fund Alvin Berisha është nxjerrë nga kampi në Siri.
“Shqiptarja.com”, duke iu referuar mediave arabe, shkruan se Alvini ndodhet në vend të sigurt dhe shumë shpejt mund të bashkohet me babanë në Itali.
Operacioni, i cili vijon ende, po zhvillohet në bashkëpunim me “Gjysmë Hënën Siriane”, Kryqin e Kuq ndërkombëtar dhe autoritetet italiane e shqiptare.
Alvin Berisha u mor me vete në Siri nga nëna e tij, Valbona Berisha, kur ishte vetëm 6 vjeç.
Nëna e tij u martua me një xhihadist nga Kosova, me të cilin shkoi në Siri më pas.
Pas vdekjes së saj,Alvini mbeti vetëm dhe mundi të takohej me babanë e tij pas 5 vjetësh, falë emisionit ‘Le Iene’.
Megjithatë Afrim Berisha nuk mund të merrte të birin mbrapsh, pasi kampi ndodhej në një zonë lufte dhe kontrollohej nga kurdët.
Nisur nga situata babai i 11-vjeçarit kërkoi ndihmë nga shteti shqiptar.
Kryeministri Edi Rama në një deklaratë për mediat, njoftoi se do të bëjë gjithçka për ta sjellë Alvinin shëndoshë e mirë në shtëpi.
Burimi: Gazeta Reforma
