Ariana Grande dhe Mac Miller, emri i vërtetë i të cilit ishte Malcolm McCormick, nisën të dilnin me njëri-tjetrin në vitin 2016 dhe filluan një lidhje të bukur dashurie, tre vite pasi ishin takuar për herë të parë dhe kishin bashkëpunuar për projektin hit “The way”.
Në Maj të vitit 2018, çifti i dha fund lidhjes ndërsa në rrjete sociale Ariana bëri të ditur se pavarësisht ndarjes, Mac vazhdonte të ishte personi më i dashur për të, ruante respektin më të madh dhe i donte vetëm të mirën.
Fatkeqësisht, në Shtator të atij viti Mac Miller u gjet i vdekur nga overdoza dhe kjo përveçse ishte një ngjarje tragjike për gjithë botën, ishte shokuese edhe për Ariana Grande-n.
Nëpër intervista, këngëtarja ka treguar se mezi e ka marrë veten nga kjo humbje, teksa ndihej e zemëruar që kishte qenë e “paaftë” për ta ndihmuar.
“Ai nuk i meritonte ‘djajtë’ që kishte në kokën e tij, me të cilët luftonte çdo ditë”- është shprehur Ariana më herët, ndërsa sa herë i jepet mundësia vazhdon të flasë me konsideratën më të madhe për ish-in e saj.
Madje, ajo e ka nderuar Mac Miller në linjën e re të produkteve të grimit. Njërën prej ngjyrave, ajo e ka quajtur “Pickin petals”, frazë e përdorur nga Mac në bashkëpunimin e tyre.
Pikërisht fakti që ende e kujton dhe e nderon, ka përlotur fansat.
