Prej thuajse tre muajsh, bizneset, transporti e shumë aktivitete të tjera u bllokuan për shkak të pandemisë Covid-19.
Përveç problemeve në sektorin ekonomik dhe shëndetësor, një ngërç u krijua edhe në sistemin e drejtësisë.
Mbyllja e gjykatave pas shpalljes së gjendjes së fatkeqësisë natyrore nga kryeministri ka krijuar kaos jo vetëm tek qytetarët, por edhe tek ata qe janë pjesë e sistemit të drejtësisë.
Pas këmbënguljes së Dhomës së Avokatisë për rihapjen e gjykatave në muajin prill me argumentin se çështjet mund të gjykoheshin duke respektuar kushtet e mbrojtjes ndaj koronavirusit, Këshilli i Lartë Gjyqësor doli me një deklaratë publike ku njoftohej se prej datës 27 prill, në gjykata do të riniste puna.
“KLGJ vendos rifillimin e veprimtarisë dhe shërbimeve gjyqësore në të gjitha gjykatat e Republikës së Shqipërisë, më datë 27.04.2020.
Ngarkohen këshillat dhe kryetarët në detyrë të gjykatave për marrjen e masave për rifillimin e veprimtarisë dhe shërbimeve gjyqësore, në përputhje dhe respektim të masave për kufizimin e përhapjes së COVID-19”, thuhet në vendimin, që hyn në fuqi menjëherë.
Edhe pse kanë kaluar 85 ditë nga ky vendim, gjykatat në vendin tonë vijojnë të jenë të mbyllura.
Në datën 10 prill 2020 Gjykata e Lartë ka bërë një njoftim për mediat ku ka njoftuar se numri i çështjeve gjyqësore është shtuar edhe më tepër, e ndërkohë që puna nuk ka nisur ende.
Mesa duket dosjet në gjykata do vazhdojnë të “flejnë” derisa të marrim një njoftim të dytë për mediat apo dhe nga vetë kryeministri Rama.
“Sipas të dhënave që rezultojnë nga sistemi i administrimit të çështjeve gjyqësore, në Gjykatën e Lartë janë paraqitur për shqyrtim mbi 35000 çështje.
Ky numër i jashtëzakonshëm çështjesh ka ardhur në rritje graduale, për shkak se Gjykata e Lartë në 10 vitet e fundit nuk ka arritur të trajtojë dhe të zgjidhë gjatë secilit vit kalendarik një numër më të madh apo të barabartë me çështjet gjyqësore, krahasuar me numrin e atyre që paraqiten për shqyrtim në çdo viti kalendarik”, shkruhet në njoftimin për mediat në faqen e websit të Gjykatës së Lartë.
Burime për “gazetareforma.com” bëjnë me dije në to shqyrtohen vetëm çështjet emergjente dhe jo ato të themelit, çka ka krijuar një bllokim të ngjashëm me atë të Gjykatës së Lartë.
Edhe pse janë hapur baret, restorantet e çdo aktivitet tjetër i mundshëm, puna në gjykata ende nuk ka filluar edhe pse kushtet për të rifilluar aktivitetin në siguri të plotë nuk mungojnë.
Në kuadër të kësaj situate, ka pasur reagime të shumta nga avokatët, të cilëve përveçse u është bllokuar aktiviteti, nuk kanë përfituar as nga paketa e ndihmës ekonomike që qeveria vuri në dispozicion të kategorive të prekura nga izolimi.
Institucionet shtetërore vijojnë të injorojnë ngërçin që ka shkaktuar mbyllja e gjykatave duke treguar paaftësi të pashembullt për të parë në aspektin afatgjatë dëmin që krijon grumbullimi i çështjeve që presin të shqyrtohen.
Sakaq, kjo zvarritje e paarsyeshme përkthehet në një drejtësi të munguar për qytetarët, që prej më shumë se dy muajsh janë privuar nga mundësia për të kërkuar drejtësi në sallën e gjyqit, në një kohë kur thuajse çdo institucion tjetër ka rinisur punën./gazetareforma
