Tom Sizemore, aktori i cili ka një karrierë që daton në vitet ’80 e që në jetën reale, luftoi me varësinë ndaj drogës ka humbur jetën. Ai vdiq, dy javë pasi pësoi aneurizëm të trurit. Aktori ishte shtruar në spital në gjendje kritike e prej 2 javësh ishte në gjendje kome dhe në terapi intensive.
Menaxheri i tij, Charles Lago, tha për ‘Yahoo Entertainment‘ se:
“Ai vdiq i qetë në gjumë në Spitalin St Joseph’s Burbank. Vëllai i tij Paul dhe djemtë binjakë Jayden dhe Jagger ishin pranë tij. Ai ishte më i madh se jeta. Ai ka ndikuar në jetën time më shumë se kushdo që njoh. Ai ishte i talentuar, i dashur, dhurues dhe mund t’ju argëtonte pafundësisht me zgjuarsinë dhe aftësinë e tij të tregimit. Jam i shkatërruar që ai ka ikur dhe do të na mungojë gjithmonë. “
Ish-gruaja e Sizemore, aktorja Maevee Quinlin, shprehu ngushëllimet për të gjithë familjen.
Lajmi vjen katër ditë pasi Lago i tha Yahoo se ekipi mjekësor i Sizemore kishte informuar familjen “nuk ka më shpresë të mëtejshme dhe kishte rekomanduar vendimin për fundin e jetës”.
Sizemore është i njohur për filmat aksion dhe dramat kriminale, që përfshijnë Saving Private Ryan , ku ai luajti Sgt. Horvath, si dhe Black Hawk Down , Passenger 57, Heat , True Romance , Natural Born Killers , Devil in a Blue Dress, The Relic dhe Strange Days .
