Nëse je abonent i Vodafone Albania dhe të ka ndodhur që oferta në celular, apo njësitë e internetit të paketës të të kenë mbaruar para afatit, ka vetëm një shpjegim: Ti po paguan më shumë sesa po të ofrojnë!
Ekziston një pakënaqësi e madhe në mesin e shqiptarëve sa u përket faturave të kripura të një prej operatorëve celularë më të mëdhenj në vend, ndaj për ta përcjellë më qartë këtë shqetësim, iconstyle.al zhvilloi një sondazh për të pyetur abontentët e Vodafone në Shqipëri në lidhje me shpenzimet e tyre mujore dhe pakënaqësitë që kanë.
Dhe rezultati lë për të dëshiruar, gati 91% e pjesëmarrësve ishin të pakënaqur me çmimet e paketave dhe mendonin se paguanin shumë!
68% e pjesëmarësve në sondazh shpenzonin 15 deri në 20 mijë lekë të vjetër në muaj për paketat dhe janë më tepër përdorures të internetit sesa të minutave apo të sms-ve.
Dhe shqetësimi më i madh i tyre ishte: Si ka mundësi që interneti harxhohet para se të mbarojë afati i ofertës? Shumë prej tyre as nuk e kuptonin sesi i harxhonin njësitë e paketës dhe i shqetësonte fakti që paguanin për një ofertë mujore që u mbaronte para se të mbyllej muaji.
Shpjegimi është i thjeshtë!
Ne kemi krahasuar shpesh herë paketa të ndryshme që ofron Vodafone në Shqipëri me ato që ofron Vodafone në itali, dhe diferenca në njësitë që ofron secili, është e madhe. Ja një shembull më konkret:
Me 15 euro në muaj Vodafone Italia të ofron këtë paketë me 60 GB internet, minuta e sms pa limit si dhe me internet pa limit për të përdorur aplikacionet, Tidal, Whatsapp, Instagram etj.
Ndërkohë me 2200 lekë në muaj, Vodafone të ofron paketën Gold, me 12 GB Internet, 60 Minuta Ndërkombëtare, Minuta dhe sms kombëtare të limituara (3500 Minuta & 400 SMS Kombëtare/Ndërkombëtare) si dhe 3000 SMS me Vodafone Club.
Operatori raporton humbje, po investimi prej 500 milionë eurosh?
Në një kohë që të gjithë jemi dëshmitarë të çmimeve të kripura të paketave që ofron ky operator, Vodafone Albania ka lajmëruar se do të bëjë një investim prej 500 milionë eurosh në infrastrukturën e rrjetit, pasi ka hyrë në tregun e telefonisë dhe internetit fiks, duke blerë aksionet e Abcom.
Pas këtij lajmi, shqetësimet tona janë të qarta:
Së pari, kompania ka zgjeruar aktivitetin e saj me blerjen e operatorit fiks, ndërkohë që nuk po bën asgjë për t’i faturuar më pak klientët e vet.
Së dyti, ajo që të bën të reflektosh është fakti që, si ka mundësi që po investohet një shumë e majme në infrastrukturën e rrjetit, në një kohë që Vodafone (një nga operatorët me të ardhurat më të mëdha dhe qarkullim vjetor prej 16.3 miliardë lekësh, sipas të dhënave nga Monitor viti 2018), ka thelluar humbjet në vitet e fundit.
Rrjedhimisht lind dyshimi nëse thellimi dhe deklarimi i humbjeve, lidhet ose jo me mospagimin e taksave!
Monitor shkruan se: “Ulja e fitimit erdhi pasi kompania ka shënuar rritje më të shpejtë të kostos së shitjes dhe shërbimeve dhe shpenzimeve të tjera, ndërsa të ardhurat ranë me 3.4%”.
Por nëse Vodafone Albania do që të investojë në tregun shqiptar 500 milionë euro, më e pakta që mund të bëjë është të jetë transparent me investimet, të përcaktojë qartazi kategoritë se ku do të investojë, që nga investimet në infrastrukturën e rrjetit e deri te reklamat, apo burimet njerëzore.
/Iconstyle.al
