Nëse dikush do të mësojë mbi efektin e jashtëzakonshëm që ka sjellë në ekonominë shqiptare pandemia e koronavirusit, mjafton të pyesë një sipërmarrës.
Teksa vendi gradualisht po rihap aktivitetet e bllokuara prej një periudhe 2-mujore, barra për biznesin sa vjen e bëhet më e rëndë, e dalëngadalë po e gjunjëzon atë.
Dhe kjo jo vetëm për shkak të izolimit që rrjedhimisht rezultoi në humbje marramendëse, por mbi të gjitha, për shkak të politikave të gabuara fiskale të shteti ynë po aplikon e që nuk po i lejon bizneset të marrin frymë.
Një ndër shqetësimet më të mëdha për sipërmarrësit aktualisht është pagesa e TVSH-së, që në kushtet e bllokimit të aktivitetit për një periudhë kaq të gjatë, është e papërballueshme e po çon biznese të shumta drejt një mbylljeje përfundimtare.
Teksa kryeministri i vendit është treguar i palëkundur në vendimin e tij për vijimin e pagesave të TVSH-së, gjasat janë që një strategji e tillë mund të fundosë bizneset.
Sakaq asnjë tolerancë nuk është dhënë për subjektet në vështirësi as nga Drejtoria e Tatimeve, që ka gjobitur bizneset për vonesat në pagesa, duke injoruar tërësisht faktin që këto biznese taksapaguese, janë në pamundësi për të paguar (të paktën në kohën e përcaktuar) detyrimet e tyre si pasojë e asaj që quhet “forcë madhore”, siç është pandemia.
Pra në vend që të krijojnë një klimë mbështetjeje për sipërmarrjen duke ofruar lehtësi siç mund të ishte një shtyrje e pagesës për TVSH-në, institucionet shqiptare kanë vendosur t’u vënë atyre lakun në fyt duke i çuar drejt falimentimit të sigurt.
E njëjta gjë vlen gjithashtu edhe për sigurimet shoqërore të punonjësve, që bizneset janë detyruar t’i paguajnë në mënyrë të rregullt për të mos u përballur me penalitete, duke thelluar edhe më tej humbjet të cilat po bëhen të papërballueshme.
Punonjësit madje janë inkurajuar të denoncojnë parregullsi të tilla kundrejt shpërblimeve, ndërkohë që institucionet mund të kishin ndërhyrë duke modifikuar skemën e pagesave në forma të ndryshme, një prej të cilave mund të ishte dhe ajo me këste.
Por në një strategji të tillë që është fokusuar më shumë në “nxitim për të marrë atë që mund të marrim sot” sesa një plan largpamës ku të dyja palët ndihmojnë njëra-tjetrën, qartazi i pari do ta pësojë biznesi, i dyti shteti.
Me ritmin aktual, nuk do të jenë të paktë bizneset që do të detyrohen të mbyllin dyert dhe çdo falimentim, nënkupton një taksapagues më pak dhe një ushtri të papunësh që do të përpiqet të mbijetojë.
Pra teksa ndaluam së vajtuari jetët e humbura, së shpejti duket se do të nisim të vajtojmë sërish: kësaj radhe për krizën që na pret e që do të lërë pasoja të rënda.
