E ftuar në emisionin “Pardon My French”, në Top Albania Radio, aktorja Egla Ceno ka zbuluar më shumë detaje në lidhje me shfaqjen më të re për të cilën po punon në Korçë, “Një martesë, një divorc dhe një funeral”.
Çfarë duhet të dimë për shfaqjen e re “Një martesë, një divorc dhe një funeral”?
Është një prodhim i Teatrit të Korçës, regjisore është Rovena Lule. Edhe Zamira Kita, Olta Daku dhe Paola Kodra. Është komedi dhe do të jepet në fund të muajit si shfaqje. Unë luaj rolin e Lilit, është më fëmija i ngelur fëmijë nga ato të treja. Nga ato që ta thotë pa e menduar fare. Ka vendosur një herë të vetme në jetën e saj të martohet sepse gjitha jetën ka ndihmuar prindërit dhe ka jetuar me ta. Nuk është martuar kurrë dhe është goxha e madhe në moshë por djali me të cilin martohet i vdes në ditën e dasmës. Kaq.
A do të kemi së shpejti një Egla që do të na sjellë një tjetër zhanër në teatër përveç komedisë?
Po punoj personalisht në fakt vetë me një grup fëmijësh me aftësi ndryshe. Është një shfaqje që bëhet në Fier nga marsi ku dua të bëj bashkë edhe disa aktorë profesionistë që do të na nderojnë me prezencën e tyre. Është një proces që sinqerisht më rrit dhe më pasuron shumë edhe si profesioniste, por edhe nga ana njerëzore. E kam shumë të ndjerë dhe kam idenë që nuk mund të bëhet me forcë një gjë e tillë. Arti është një dashuri e madhe.
