Pas procedimit penal nga policia, ka reaguar artisti i njohur Robert Aliaj i cili prej ditësh ka dalë hapur duke mbështetur protestën e studentëve.
Aliaj dhe 24 persona të tjerë persona mes tyre edhe Edmond Tupe akuzohen se kanë protestuar në mënyrë të paligjshme, pa lejen e organeve kompetente duke prishur rendin e qetësinë publike, duke penguar qarkullimin e mjeteve të transportit, duke hedhur sende të forta në oborrin e institucionit.
Ndërkohë pak minuta më parë, Aliaj ka reaguar personalisht për procedimin duke e quajtur absurd. Ai u shpreh se ditën e djeshme ka qenë në fitness dhe më pas në shtëpi.
“Ata që e kanë bërë këtë duan të më vënë kundër shtetit. Është absurde sepse unë kam qenë në fitness deri në orën 10:00 dhe më pas në shtëpi.
Kjo bëhet për të destabilizuar çështjen e studentëve dhe unë jam kundër politizimit të lëvizjes studentore.
Unë jam për studentët dhe kam bërë thirrje që ata të tregojnë dialog dhe vendosmëri. Me dialog nënkuptoj paqe.
Unë nuk kam qenë fare në qendër dje. Duan të njollosin emrin. Unë nuk mbështes asnjë forcë politike”, ka thënë Robert Aliaj.
