Një grua, e cila po përgatiste një festë surprizë për ditëlindjen e bashkëshortit të saj, ka mbetur e shokuar pasi, duke kërkuar në telefonin e tij për kontaktet e miqve, pa rastësisht një bisedë grupi që i theu zemrën.
Në një postim në forumin britanik Mumsnet.com, gruaja tregoi se kishte lexuar disa mesazhe “të tmerrshme” që burri i saj shkruante për të.
“Ajo që lexova ishte diçka e tillë: ‘Jam i mbërthyer në një martesë të mjerueshme, do doja të kisha një lidhje jashtëmartesore, por ajo do më merrte të gjitha paratë dhe unë s’do kisha ku të jetoja. Le ta mbajë djalin, unë dua vetëm të mbaj paratë e mia’,” shkruan ajo.
Situata u bë edhe më e rëndë kur pa se edhe miqtë e burrit ishin “bashkëpunëtorë në këtë bisedë”, duke e përshkruar situatën e tij si një “rrugë pa dalje”.
Gruaja zbuloi gjithashtu shumë mesazhe ku burri i saj dhe shokët e tij bënin komente për “mamat e nxehta” dhe për pamjen fizike të grave të tjera, madje ai kishte dërguar edhe një foto të një gruaje që e kishte parë në rrugë dhe që e konsideronte “shumë seksi”.
“Është gjithçka shumë poshtëruese dhe mungesë respekti ndaj meje,” shkruante ajo.
Por kjo nuk ishte e gjitha. Duke kërkuar më tej, ajo zbuloi se bashkëshorti kishte gënjyer për të para miqve të tij, duke shpikur fjalë që ajo nuk i kishte thënë kurrë, vetëm për ta nxjerrë keq para tyre.
Gruaja, e cila kishte pesë vite që ishte nënë në shtëpi (SAHM — stay-at-home mom), tregoi se burri ankohej me miqtë se ajo nuk kontribuonte financiarisht, duke e paraqitur si dembele dhe të pavlefshme.
“Për mua, këto mesazhe ishin një zbulim tronditës,” shtoi ajo. “Tregonin një përçmim të thellë ndaj meje. Është e qartë se ai nuk më sheh si një partnere të barabartë dhe nuk vlerëson kontributin tim në shtëpi.”
