Aksioni për të shembur të tjera banesa në lagjen “5 Maji” vijon edhe ditën e sotme. Policia dhe Inspektoriati për Mbrojtjen e Territorit kanë shkuar sërish që në mëngjes për t’iu prishur shtëpitë teksa banorët kanë bërë rezistencë, por ata nuk ia kanë dalë dot pasi fadromat tashmë kanë nisur punën.
Nga terreni raportohet se ata e kanë kaluar natën jashtë duke sfiduar temperaturat e ulëta të motit të ftohtë mbledhur rreth një zjarri për tu ngrohur. Një moment që bën përshtypje është kur një banor ka hipur mbi murin e shtëpisë së tij, ku me anë të certifikatës së pronësisë në duar ai bën thirrje për të mos i shembur banesën. Rezistenca e tij ka qenë e kotë, pasi më pas është larguar me forcë nga policia dhe më pas fadroma nisur shembjen e banesës së banorit.
Gjithashtu, shumë prekëse janë fjalët e një gruaje tek lagjia “5 Maji”. Në momentin që fadromat janë drejtuar drejt shtëpisë së saj, ajo u ka bërë thirrje të ndalojnë pasi brenda ndodhet i vëllai i cili është në gjendje të rëndë shëndetësore.
“Po më lini të hyj mor, më lini, se po më vdes vëllai nga ankthi. Po këta janë vrasës mor, janë vrasës, po na nxjerrin nga shtëpitë.”-ishin këto fjalët e zonjës.
Kujtojmë që banorët e “5 Majit” kanë zhvilluar protesta të vazhdueshme përpara Bashkisë së Tiranës si dhe para Kryeministrisë duke kërkuar që banesat e tyre të mos shemben. Mirëpo, mesa duket aksioni i fadromave vijon për të shembur banesat e kësaj zone në kuadër të projektit të “Unazës së Madhe.”
