Bizneset e vogla janë ato që po i vuajnë më së shumti pasojat e krizës ekonomike nga pandemia e koronavirusit, dhe situata është vërtet shqetësuese.
Në një komunikim për “iconstyle.al”, kryetari i Shoqatës së Lokaleve dhe Restoranteve, Enri Jahaj bëri me dije se çdo ditë po mbyllen bizneset e vogla familjare, të cilët janë edhe më të prekurit pas mbylljes së detyrueshme që nga muaji mars deri në maj.
Sipas burimeve për “iconstyle.al”, 3 deri në 5 biznese në ditë po mbyllen dhe situata pritet të përshkallëzohet pasi kjo është vetëm vala e parë. Të gjunjëzuar nga pandemia globale dhe me vendimin e nxituar të qeverisë për ndalimin e punës në këto biznese, situata duket se po përshkallëzohet drejt një krize të madhe.
Rihapja nuk e ndali krizën!
Rihapja më 18 maj duket se nuk e ndali krizën, por pas kësaj date u kuptua sesa thellë ishin fundosur ekonomikisht këto biznese. Shqipëria ka rreth 18 mijë bare e restorante (82% e të cilave janë bar-kafe), sipas INSTAT, me mbi 50 mijë të punësuar, ose rreth 10% të të punësuarve në sektorin privat në total.
Por vetëm në tremujorin e parë të vitit, numri i të punësuarve në këtë aktivitet ra me 21.7% (lexo këtu) dhe fondi i pagave u tkurr me rreth 20.6%, duke shënuar performancën më të keqe nga të gjithë sektorët e shërbimeve sa i takon punësimit, sipas Monitor.al.
Operatorët e tregut pohojnë se konsumi dhe frekuentimi është i ulët, sidomos për restorantet, ndërsa klubet e natës, që kishin dhe konsumin më të lartë, vijojnë të jenë të mbyllura.
Më të prekurit, club-et verore!
Enri Jahaj tha për iconstyle.al se në kulmin e turizmit, më të prekurit janë clubet verore nëpër plazhe që nuk kanë më xhiron e pritur.
Kërkesat për qeverinë në këtë periudhë të vështirë, janë ulja e TVSH-së dhe heqja e hapësirës publike deri sa të mbaroje kjo gjendje.
“Reduktim i TVSH-së në masën e hotelerisë pra 6 %, është një ndër kërkesat, pasi kjo do i jepte një shtysë sektorit dhe nuk do kishim pse të rrisnim çmimet; shtyrjen e te gjitha llojeve te taksave deri ne mars 2021; Fillimin e dhënieve të kredive te buta për kapital qarkullues pasi deri tani nuk kane filluar ende dhe hartimin e një plani strategjik për rimëkëmbjen e sektorit”.
Enri Jahaj, kryetari i Shoqatës së Lokaleve dhe Restoranteve
Në korrik, qeveria vendosi për mbylljen e klubeve të natës, diskove, si dhe lounge bareve në ambient të hapur apo të mbyllur, duke i goditur keq këto biznese në vend, për vetë faktin se ishte një vendim shumë i paqartë dhe i pastudiuar (lexo këtu).
Muzika live nuk ka qenë lejuar që nga muaji mars e megjithatë abuzime ka pasur nga lokale të ndryshme, të cilat janë shoqëruar edhe me gjoba. Por duket sikur këto rregulla dhe masa ndëshkimore aplikoheshin nderi në qytetin e Durrësit, pasi në resortet e jugut, ka pasur shumë abuzime për të cilat u mbyllën të dy sytë.
Pak kohë më parë në një intervistë për iconstyle.al Jahaj tha se lihet të interpretohet se kush quhet lounge dhe kush quhet bar apo restorant.
“Problemi është si transmetohet lounge dhe bar dmth tani ky vendim nuk është shume i qartë pasi lihet të interpretohet në terren se kush quhet lounge, kush bar, kush restorant etj. Po, ne duam t’i respektojmë protokollet po duhet bërë një sensibilizim më i madh pasi ende sheh rrugëve njerëz që përqafohen e takohen si me parë”.
Muajt në vijim parashikohen të vështirë pasi nuk ka pasur turistë dhe me gjendjen e deritanishme, klientët kanë filluar të kursejnë e të përgatiten për muajt më të vështirë që pritet të vijnë shtator, tetor. Kriza në këtë sektor do të vijë duke u përshkallëzuar duke qenë se Shqipëria mban rekordin në botë me numrin e bareve (518 bare) për çdo 100 mijë banorë.
/Iconstyle.al
