Në protestën e Sindikatës së Artistëve të Skenës ndodhi një incident, ku një grua e panjohur fyeu dy nga aktoret e njohura, Yllka Mujon dhe Eva Alikajn.
Kjo e fundit vendosi të reagonte për “Panorama Online”, duke treguar situatën e sikletshme me të cilën u përballë sot.
Eva Alikaj tregoi se u sulmua verbalisht nga një grua, e cila ishte shprehur e indinjuar nga heshtja e dy aktoreve ndaj shembjes së Teatrit Kombëtar.
“Ishte një grua e inatosur dhe tha: “Po ju mi, pse nuk luftoni për Teatrin, po luftojmë në për të luajtur ju, për surratin tuaj”. Pastaj tha dhe disa fjalë për Yllka Mujon. Ishte me një pllakat në dorë”, tregoi Alikaj për ngjarjen.
E pyetur për komentin e saj lidhur me këtë incident, aktorja u shpreh se është zgjedhja e qytetarëve që të protestojnë në format që dëshirojnë, por nga ana tjetër tha se ndjen keqardhje për sulmet që po u bëhen artistëve.
“Është e drejta e asaj të bëjë çfarë të dojë. Secili ka mundësitë e tija, të drejtën e tij. Ne jemi në punë aty. Saç kanë të drejtën ata të protestojnë, ne kemi të drejtën të punojmë. Por nuk mendoj se njerëzit duhet të jenë agresivë me artistët, nëse bëhet fjalë për mbrojtjen e godinës, duhet të mbrohen dhe njerëzit, artistët. Nëse ti u thua “për surratin tuaj” artistëve, nuk ka kuptim dhe kauza pastaj. Në këtë rast e shpaguajnë artistët, unë mendoj se Yllka Mujo është një zonjë e nderuar një artiste e shtuar e teatrit. Nuk më vjen mirë që të sulmohen artistët dhe në këtë rast po e paguajnë artistët”, përfundoi Eva Alikaj.
Ndërsa aktorja e mirënjohur Yllka Mujo vendosi që të mos komentonte incidentin, duke u shprehur për “Panorama Online” kështu:
“Nuk merrem me gjëra të tilla”.
Burimi: Panorama Online
