Mëngjesin e tetë qershorit, Xhuljeta Çuni ishte nisur për të zhvilluar provimin e letersisë, por u qëllua për vdekje me dy plumba pas shpine nga ish i dashuri i saj Xhaferr Mata, i cili më pas qëlloi edhe veten. Një nga mikeshat më të ngushta të saj, që e njeh që në shkollën 9-vjeçare, rrëfen bisedën e fundit më 7 qershor, 1 ditë përpara vdekjes.
“Xhuljeta ishte një nga njerëzit më gazmorë të klasës, ishte ajo që na ndihmonte gjithmonë për të arritur objektivin tonë për një notë të mirë. Ka qenë një ndër vajzat më të dashura. Po kërkonte një uniformë për diplomimin dhe mbrëmjen e maturës, ku nuk do të arrijë dot që të marrë pjesë”, shprehet mikesha e saj për televizionin “Top Channel”.
Ndërkohë për jetën e saj private, shoqet treguan se ajo ishte natyrë e mbyllur dhe nuk shprehej në lidhje me marrëdhëniet me djemtë.
“Nëse do e dinim ndoshta do të bënim diçka, por tani është vonë”, thonë ata.
Sakaq, Shërbimi për Çështjet e Brendshme dhe Ankesat tregoi se efektivët që trajtuan rastin e denoncimit nuk kanë asnjë përgjegjësi ligjore.
