Nëse është e vërtetë që njëfarë xhelozie e shëndetshme brenda marrëdhënies është e mirë, po aq e vërtetë është edhe që mania e kontrollit dhe fiksimi janë arsyeja kryesore e ndarjes së çifteve sot.
Linja midis xhelozisë dhe fiksimit është shumë e hollë. Ky kufi kryqëzohet kur filloni të keni një ndjenjë të varësisë nga marrëdhënia. Kur partneri/ja bëhet qendra e botës, sikur të mos ekzistonte asgjë tjetër, atëherë nisin edhe problemet.
Shumë shpesh, njerëzit që kanë tendencë të jenë obsesivë dhe zotërues ndaj gjysmës së tyre, janë ata që vuajnë nga varësia emocionale dhe për këtë arsye i gjejnë tek partneri të gjitha mangësitë që kanë në zemrën dhe shpirtin e tyre.
Sigurisht, secili rast duhet të vlerësohet individualisht për të zbuluar origjinën e xhelozisë poseduese, por gjithçka lind në rastet kur njeriu përjeton varësi totale nga partneri/ja.
Xhelozia e tepërt, në shumicën e rasteve, rezulton si mani e kontrollit. Një sjellje kjo shumë e dëmshme për marrëdhënien dhe për njerëzit që janë pjesë e saj. Kontrolli i vazhdueshëm i gjithçkaje që partneri/ja bën, e konsumon energjinë e të dyve brenda marrëdhënies.
