Prej rreth një viti po bashkëjetojmë me një virus, i cili pavarësisht të gjitha zbulimeve që bëhen rreth tij, ka ende shumë të panjohura. Ditën e sotme Ministria e Shëndetësisë bëri me dije se gjatë 24 orëve të fundit është rritur ndjeshëm numri i rasteve të reja, pasi 707 qytetarë kanë rezultuar pozitivë në testin e koronavirusit, teksa kanë humbur jetën 4 persona.
Tashmë fazën e mësimit me mënyrën e re të jetesës e kemi kaluar, pasi ka nisur procesi i vaksinimit të qytetarëve, duke hyrë në një fazë të re.
Mbrëmjen e sotme mjeku infeksionist Gent Stroni ishte i ftuar në Radarin Informativ ku kërkoi nga institucionet një strategji “post-covid”, teksa rrëfeu disa raste me pacientët e tij dhe problemet që hasin pas kalimit të koronavirusit.
“Mendoj që po hyjmë në një epokë tjetër, “post covid”. A duhet një strategji për të trajtimin “post covid”? “Mendoj se po. Një paciente kishte tre javë pa fjetur gjumë pas covidit. Një tjetër kishte një gjendje ankthi të shtuar. Unë shikoj edhe te pacientë të tjerë që i trajtoj në shtëpi, ata që janë pasdite. Dhe tashmë marr kontakte me ata që e kanë kaluar dhe i pyes cila është dita më e keqe gjatë covid, dhe ata njëzëri përmendin disa shenja që lidhen me aspektin psikiatrik. Jo më kot patëm humbje, pacientë që kryen vetëvrasje. Është një goditje e covid-it. Disa thanë “Nuk e dinim se ku ishim” në ditën më të keqe. Këto elementë të lënë të kuptosh, janë persona të ndryshëm që shprehin të njëjtën gjë” tha ai.
Nga ana tjetër, Stroni sot bëri vaksinën kundër koronavirusit. Ai tregoi se ndihet shumë mirë, duke shtuar se çfarëdo të jenë efektet anësore do jenë më pak se dëmi i shkaktuar nga Covidi.
“Deri tani nuk kam efekte anësore. Cilado që të jenë efektet anësore do të jenë shumë herë më pak sesa shohim përditë çfarë covid-i bën. Janë të pallogaritshme dëmet që covid-i bën” tha ai.
