Pyetjeve të shumta lidhur me plazhin këtë sezon turistik dhe mënyrën se si do të veprohet, iu është përgjigjur sonte Edi Rama në “Opinion”.
Ai ka treguar se plazhi sivjet do të jetë publik dhe se nuk do të ketë asnjë kontratë private për shezlonget dhe çadrat, përveç hoteleve.
“Nuk mund të rrimë të mbyllur pa turistë, por marrjen e këtij risku do të thotë që të gjithë të bëjnë çmos të respektojnë ato pak rregulla që janë… Ne nuk duam që të vëmë masa drastike si po bëjnë disa shtete jashtë… Nuk do bëjmë plazh me policë e ushtarë, por duam mirëkuptimin e shqiptarëve. Një gjë e sigurt dhe që do t’u pëlqejë shqiptarëve, është se nuk do lejohet asnjë kontratë private për shezlonge për çadra, përveç hoteleve. Të gjitha plazhet e tjera do të jenë të lira, publike dhe njerëzit do bëjnë plazh siç bënim dikur kur ishim të vegjël, ku s’kishim shezolng dhe akomodoheshim me mjete rrethanore. Plazhet do jenë masivisht publike dhe s’do ketë më njerëz që dalin me hunj dhe dhëmbë të prishur, që u thonë turistëve paguaj 10 euro që të futesh këtej, e 20 euro që të dalësh andej… Plazhet do t’i kenë shqiptarët, shqiptarët e të gjitha trojeve”, deklaroi Edi Rama.
Gjithashtu Rama tha se sivjet nuk do të ketë pushime jashtë Shqipërisë.
“Do e kenë të pamundur për të bërë pushime jashtë. Kam bërë biseda në telefon me kolegë në Europë, por situata është e paqartë, ka qendrime të ndryshme për kufijtë si do jetë turizmi, të gjithë po synojnë turizëm të brendshëm ose me korridore, si Austria me Gjermaninë, me Danimarkën. Franca ka historitë e veta, Italinë nuk e do asnjë se duket me rrezik”, tha ai.
