Një ngjarje tronditëse ndodhi në një shkollë profesionale në Essen, Gjermani, ku një mësuese u plagos rëndë me thikë nga një nxënës 17-vjeçar me origjinë nga Kosova. Autoritetet gjermane kanë deklaruar se sulmi dyshohet të ketë pasur motive fetare. Ministri i Brendshëm i landit Nordrhein-Westfalen, Herbert Reul, tha se analizat fillestare të videove të gjetura në pajisjet e autorit të dyshuar tregojnë shenja të qarta të një motivimi islamist.
Sipas policisë, 17-vjeçari e ka justifikuar veprimin e tij në një video të regjistruar, ku deklaron se mësuesja kishte fyer Profetin. Gjatë videos, ai ka thirrur disa herë “Allahu Akbar”. Kjo ka shtuar dyshimet për një akt të ndikuar nga ekstremizmi fetar.
I riu nuk është i panjohur për autoritetet. Ai ka qenë më parë nën mbikëqyrjen e policisë për shkak të sjelljeve të dhunshme, kërcënimeve dhe shkeljeve të ligjit për armët. Në vitin 2023, ai ishte klasifikuar si individ me “potencial rreziku”, por më vonë kjo masë u hoq pasi nuk pati incidente të reja për një kohë.
Hetuesit po shqyrtojnë gjithashtu nëse 17-vjeçari është i përfshirë në një tjetër tentativë për vrasje të ndodhur po atë ditë në qendër të Essenit, ku një burrë i pastrehë u sulmua. Hetimet po vazhdojnë për të sqaruar të gjitha rrethanat dhe motivet e ngjarjes.
