Trendi më i fundit i stilimit të flokëve por edhe më i guximshmi është ai i vendosjes së piercing në flokë. Tingëllon çuditshëm, por nëse shihni fotot bëhet fjalë për disa vathë rrethorë që vihen në flokë.
Tre javë më parë ishte blogerja e njohur Armina Mevlani ajo që risolli trendin e ri dhe shumë të veçantë, të vendosjes së piercing, ose vathëve metalike në flokë. Armina përqafoi trendin e ri dhe këtë e bëri publike në mediat sociale, me postimin e fotove në “Snapchat”.
Më pas, njëra nga këngëtaret që ka eksperimentuar më së shumti me flokët, Genta Ismaili, i çuditi të gjithë kur përveç gërshetave dhe piercing të vendosur në to, ajo u shfaq me paramanda ose karfica në kokë. Kjo ide “e çmendur”, por shumë trendi, ishte e stilistit të mirënjohur Kaçi Lleshi, i cili vjen gjithmonë me risi.
Së fundmi, Soni Malaj ka përfituar nga një vizitë në Kosovë për të provuar trendin më të ri të piercing në flokë, që me thënë të drejtën i shkon shumë.
Dafina Zeqiri guxon gjithashtu me flokët e saj, dhe pavarësisht se sot ka kuruar imazhin duke qenë se po depërton në tregun amerikan të muzikës, ne e patëm të lehtë t’i gjejmë një foto me piercing në flokë.
Rita Ora e ka provuar gjithashtu trendin më të ri, dhe ka guxuar edhe me prerjen shkurt të flokëve.
Burimi: Iconstyle.al
