Sado që mund të duket klishe, shpesh nuk janë mundësitë ato që na pengojnë për të bërë gjëra të adhurueshme, por mungesa e pasionit apo e vullnetit. Kur Sirio Berati kuptoi vite më parë dashurinë e tij për fotografinë posedonte vetëm një celular të thjeshtë, me të cilin ishte i kufizuar.
Por kurioziteti bëri që të mos ndalonte dëshirën e tij për të krijuar imazhe të bukura për syrin. Edhe pse në Shqipëri emri i tij nuk është në listën e fotografëve më të njohur, ai është ndër të rrallët, punët e të cilit janë publikuar në profilin e tij në “Vogue Italia”.
Në një intervistë për “iconstyle.al”, 19-vjeçari tregon sesi u lidh me përfaqësuesit e revistës së famshme vitin e kaluar.
https://www.instagram.com/p/BllIxxKjDch/
“Kontaktin e parë me ‘Vogue Italia’ e kam pasur me një nga miket e mia që modelon në Milano. Një nga fotografët e saj më sugjeroi të dërgoja punët e mia në portalin e ‘Vogue’”, tregon Sirio.
Ai na sqaron me detaje sesi funksionon i gjithë procesi, derisa pranohen punët:
“Platforma e ‘Vogue’ është e hapur për të gjithë artistët. Çdokush mund të aplikojë në teori, por punët që zgjidhen pas dërgesës janë shumë selektive në varësi të idesë dhe stilit. Vetëm 2 foto lejohen të publikohen nga një artist i regjistruar, që është shumë e ngushtë. Kur them që bëj projekt për ‘Vogue’, e kam fjalën që shoh të gjitha kërkesat e stafit të tyre për tematikat, ngjyrat, modën, stilin, etj. Mblidhemi një grup artistësh të fokusuar në këto specializime dhe sjellim një projekt në jetë që shpresojmë të pranohet”.
Prej 4 muajsh ai jeton në Kanda, ku studion për drejtësi, por pavarësisht angazhimeve tregon se nuk heq dorë nga pasioni. Madje shumë shpejt Sirio tregon se do të përgatisë një tjetër projekt të tij për të kërkuar mundësinë që të publikohet te revista prestigjioze.
“Për momentin e kam lënë pas dore portofolin time në ‘Vogue’, por së shpejti, me një grup stilistësh, dizajnuesish, artistësh makijazhi dhe modelesh këtu në Kanada, kemi vendosur të bëjmë një ‘photoshoot’ veçanërisht për ‘Vogue’. Do të jetë një ‘photoshoot’ lidhur me modën, veçanërisht në linjat e ‘Met Gala’. Do të ketë një simbolikë dhe narrativë nga pas që mbetet për të diskutuar”, shprehet artisti viziv për “iconstyle.al”.
Dhe ne kujtojmë që Met Gala është një nga aktivitet e modës që mbledh këngëtarët, modelët dhe personazhet e njohur të veshur sipas një teme të caktuar. Është një nga eventet më të shumëpritura të vitit, pasi e gjithë vëmendja drejtohet tek veshja e yjeve dhe këtë vit tema është “Camp: Notes on Fashion”: Që nënkupton shpirtin e ekstravagancës.
Sirio shprehet se për të realizuar këtë projekt, duke ditur se veshjet dhe aksesorët janë të bëra posaçërisht për të, investimi nuk është i vogël.
“Gjithsecili jep kontributin e vet për sa i përket pjesës monetare, por vjen më shumë në linjën e bashkëpunimit”, shton ai.
https://www.instagram.com/p/BoerHaWDcfQ/
Sirio ka prezantuar prej pak kohësh ekspozitën e parë në Angli, ku vendosi të prezantonte edhe punët e tij më të reja, që janë vepra 2D. Ai shprehet se “Photoshop”-i i jep mundësi që të shohë përtej realitetit, duke i nxitur kreativitetin.
Nga ana tjetër ai po eksperimenton edhe me një art të veçantë me fotot lëvizëse.
https://www.instagram.com/p/BqVa6I6gYNE/
I pyetur për ndryshimin mes artit të fotografisë në vendin tonë dhe në vendet e ndryshme të botës, Sirio e koncepton kështu:
“Nëse një fotograf ndihet sadopak artist, normalisht implementon një pjesë të vetes së tij në atë që shkrep dhe krijon. Nëse flasim për fotograf, thjesht sepse e kanë për detyrë për të shkrepur foto, nuk ka nevojë që të implementojnë një mesazh. Edhe fiziku femëror ka në vetvete një lloj mesazhi, për sa kohë nuk kthehet në vulgaritet dhe përdoret veç për komercializëm”.
Ai shprehet se preferon të bashkëpunojë me njerëz që kanë guxim të sjellin diçka të re, e vlerësojnë një artist dhe nuk e shikojnë thjesht si një individ që duhet të japë një produkt sepse po paguhet.
