Një foshnjë e lindur me peshë vetëm 245 gramë, që besohet të jetë më e vogla që i ka mbijetuar lindjes së parakohshme, ka dalë nga spitali në SHBA shëndoshë e mirë.
Foshnja e quajtur Saybie peshonte sa një kokërr molle kur lindi në javën e 23-ë në dhjetor 2018. Ajo ishte aq e vogël sa mund ta mbaje në një pëllëmbë dore kur erdhi në jetë!
Ajo iu nënshtrua menjëherë një kujdesi dhe trajtimi intensiv në Spitalin Mary Birch në San Diego të Kalifornisë.
Mjekët i thanë prindërve të Saybies se ajo do të jetonte vetëm disa orë, por sot pesë muaj më vonë, vogëlushja është shëndoshë e mirë dhe peshon 2.5 kg, duke thyer të gjitha pritshmëritë.
Një infermiere që kujdesej për Saybie-n e vogël që po luftonte për mbijetesë tha se, shërimi i saj dhe dalja nga spitali këtë muaj ishte një “mrekulli”.
Saybie mendohet të jetë fëmija më i vogël në botë që i ka mbijetuar lindjes së parakohshme. Rekordi i mëparshëm mbahej nga një vajzë e vogël nga Gjermania, e cila kishte lindur me peshë 252 g në vitin 2015.
/BBC
