Ai njihet si një ndër rastet më të suksesshme të rënies në peshë dhe më në fund, Erik Fullani ka zbuluar për herë të parë se si arriti të rrëzonte 90 kilogramë.
I ftuar te “Rudina” në Tv Klan, Eriku rrëfeu se pesha e tij maksimale ka arritur në 178 kilogramë, ndërsa sot peshon 90 kg, pothuaj dy herë më pak se pesha që kishte më parë, por shtoi se tashmë gjithçka ka ndryshuar.
“Mënyra e jetesës ka qenë problemi i mbipeshës sime, oraret e çrregullta të gjumit dhe të ngrënit jashtë. Unë s’e kam thënë kurrë, por maksimumi i peshës sime ka qenë 178 kile, ndërkohë që jam 1.90 i gjatë. Jeta ime tani ka ndryshuar. Nisma për të humbur peshë ka nisur nga një debat në familje ku unë shprehesha se mund të bëj gjithçka për familjen.
Dhe ata më kërkuan të bie në peshë dhe kështu fillova. Unë tani jam 90 kile dhe jeta ime ka ndryshuar shumë. Tani ndihem shumë më mirë, rrobat më rrinë më mirë dhe bëj fotografi. Mbipesha më ka bërë të ndihem keq që i vogël. Pesha merret shumë kollaj, por rikthimi i peshës është e vetmja gjë që më tremb dhe tani kam një regjim. Unë s’dua të jap këshilla se njerëzit që më jepnin këshilla mua kur isha i shëndoshë i merrja inat”, tha Fullani për “Rudina”.
