Intervista e ish-Dukës dhe Dukeshës së Sussex, Harry-t dhe Meghan Markle ka tronditur botën dhe sidomos Pallatin Mbretëror. Dyshja nxorën në dritë prapaskenat e errëta të Pallatit, që askush s’i kishte ditur më herët. Meghan dhe Harry folën pa dorashka dhe rrëfimi i tyre ekskluziv për Oprah Winfrey është ndjekur nga 17 milionë persona në mbarë botën.
Ndër të tjera, Meghan tregoi se po mendonte vetëvrasjen gjatë kohës kur ishte shtatzënë me Archie-n dhe kjo kishte qenë periudha më e vështirë që kishte kaluar në jetën e saj.
“Akumulova shumë për muaj të tërë derisa arrita në pikën që nuk doja më të jetoja. I kërkova ndihmë burimeve njerëzore të ‘institucionit’ dhe përgjigja që mora prej tyre ishte që nuk më ndihmonin dot se nuk ishte pjesë xheniuine e familjes mbretërore. I thoja Harryt që nuk ndihesha e sigurt dhe kisha frikë të rrija vetëm në shtëpinë tonë”, tha Meghan.
Gjithashtu, Duka pranoi se i vinte turp të tregonte për gjendjen e partneres së tij, pavarësisht se donte ta ndihmonte me çdo kusht.
“Ndihesha i mbytur dhe vetëm njohja me Meghan më largoi nga aty. Ishte ajo që më gjeti rrugën e daljes nga ai ambjent”, tregoi ai.
Përveç Harry-t, është edhe dikush tjetër që e ka ndihmuar dukeshën ta kalojë këtë gjendje dhe t’i shpëtojë vetëvrasjes.
Bëhet fjalë për mikeshën e vjetër të Princeshë Dianës. Megjithëse nuk përmendi emra, ekspertët mbretërorë janë të bindur se bëhet fjalë për Julia Samuel, profesioni i së cilës është psikoterapia. Edhe pas vdekjes së princeshës, zonja në fjalë ka ruajtur raporte të ngushta me djemtë e Dianës, madje është kumbarë e Princ George.
Julia Samuel vazhdon të ruajë raporte me familjen mbretërore dhe nuk ka reaguar lidhur me këtë situatë.
