Megjithëse për artistin Genc Fuga u sensibilizua një Shqipëri, duke i ardhur në ndihmë për operacionin në momentin më të vështirë të jetës, problemet e shqiptarëve nuk kanë fund dhe sistemi i shëndetësisë vazhdon të mbetet skandaloz!
Raste të tjera në gjendje kritike për jetën kanë mbërritur paralelisht me Fugën në redaksinë e “Iconstyle” nga qytetarë të thjeshtë në pikë të hallit, që shtrijnë dorën pasi qeveria e sistemi i shëndetësisë në gjendje të mjerueshme s’i ndihmon.
Kush shumë e kush pak, personazhet u solidarizuan me Fugën duke e ndihmuar të mbledhë shifrën e operacionit, por është e pamundur të ndihmohet çdo qytetar! Kontributi monetar është vetëm një zgjidhje momentale, që në fakt lan “gjynahet” e qeverisë tonë, që i lë njerëzit të vdesin nëse s’kanë të paguajnë.
Më shumë sesa vlera monetare, ka vlerë përdorimi i zgjuar i rrjeteve sociale (nga të gjithë personazhet publike që sot kontribuan me një shifër modeste ose jo), duke ngritur zërin për të kërkuar reformë të thellë në sistemin shëndetësor shqiptar.
Kërkimi i llogarisë publike nga ata që paguajmë për të na shpëtuar jetën dhe ngritja e zërit nëpërmjet postimeve në rrjete sociale nga personazhet që kanë zë në publik, do të ndihmonte shumë më tepër Fugën e secilin prej nesh, që kërkon një sistem të denjë shëndetësie.
Me gishtat e njërës dorë mund t’i numërojmë në Shqipëri personazhet jo të shitur dhe jo lëpirës, që i përdorin rrjetet e tyre për të vënë në dukje problematika, kritika apo këshilla kundrejt qeverisë e shkeljeve të saj.
S’ka të madh e të vogël që nuk është në dijeni për faktin që mediat në Shqipëri janë nën kontroll të qeverisë, që u jep tendera dhe reklama. Mirëpo, po kur bashkimi bën fuqinë dhe zëri ngrihet nga të gjithë bashkë, sa vlen qeveria në këtë rast?
“Iconstyle” u bën thirrje të gjithë personazheve të ekranit që sot u solidarizuan me Fugën, të solidarizohen nëpërmjet platformave të tyre për të gjithë shqiptarët! Ngrijeni zërin për problematikat e shkeljet që marrin çdo ditë jetë! Le të kërkojmë së bashku reformë në shëndetësi.
Shëndeti ynë nuk kërkon vetëm zgjidhje momentale, as “mëshirë” e “gjynah” nga populli, që financon atë që duhet të financonte qeveria! Problemet zgjidhen vetëm nëse u jepet zë!
