Policia e Shtetit ka përdorur gaz lotsjellës dhe ujë të ftohtë për të shpërndarë qytetarët këto ditë gjatë protestave. Përveçse gazi lotsjellës cilësohet si shumë i dëmshëm, të gjithëve ju ka bërë përshtypje fakti se nga gjendet gjithë ky ujë për të mos lejuar grumbullimet e qytetarëve. Është fakt se Shqipëria prej 30 vitesh vuan nga mungesa e ujit të pijshëm, ndërkohë që në protestë na u vërtetua e kundërta.
View this post on Instagram
Rritje çmimi dhe tendera, por ujë nuk ka!
Siç theksuam më lartë gjatë këtyre ditëve ka pasur ujë me shumicë për protestën, mirëpo për furnizim me ujë të pijshëm 24 orë në ditë as që bëhet fjalë. Ndërmarrja e Ujësjellës Kanalizimeve ka zhvilluar një sërë tenderash për shtimin e kapaciteteve në impiantin e Bovillës për të pasur ujë 24 h në kryeqytet, mirëpo hapa konkret nuk ka dhe madje me këtë pretekst ka pasur edhe rritje të çmimit të ujit.
Nën këtë argument dy vite më parë u propozua dhe u bë edhe rritje e dukshme e tarifave për furnizimin me ujë. Konkretisht në janar të vitit 2018 çmimi i ujit të pijshëm u rrit 65 lekë/m3 nga 45 lekë për m3, që ishte më parë, ose 44% më i shtrenjtë.
Kjo bëri që në dy vitet e fundit UKT-ja, të ketë një bilanc pozitiv ku për vitin 2018 u dyfishua fitimi në 10 milionë euro, kur në të njëjtin vit investimet ishin 54% më pak se plani.
Në vitin 2019 fitimet e UKT ishin 8.6 milionë euro. Ndryshe nga 2018-a, kur arkëtimet u rritën me 38% me bazë vjetore, si rrjedhojë e shtrenjtimit të tarifave më 44%, në 2019-n të ardhurat e raportuara shënuan një rënie të lehtë me 1.9%.
Në 2019-n Ujësjellësi hartoi dhe projektin “Furnizimi me ujë 24 h” për sot dhe për një perspektive 25-vjeçare të qytetit të Tiranës nëpërmjet Unazës së presionit mbështetur në studimin e masterplanit të zhvillimit teknik dhe strategjik nga “Budapest Water Works”.
Ndërkohë që vetëm pak kohë më parë u hap një tjetër procedurë për rishikimin e planit 5 vjeçar të biznesit të Ujësjellësit, ku ndër të tjera do të analizohen edhe tarifat duke parë mundësinë e rishikimit, edhe pse deri tani flitet vetëm për rritje dhe aspak për një ulje të tyre.
Pallatet vazhdojnë me pompa e depozita në tarracë!
Pavarësisht se pas tërmetit të 26 nëntorit, kreu i bashkisë së Tiranës, Erion Veliaj, dha ultimatum për heqjen e depozitave nga pallatet asgjë nuk është bërë deri më sot. Në të gjithë pallatet, madje edhe në qendër të kryeqytetit vazhdon të ketë depozita apo pompa uji për të siguruar furnizimin me ujë 24 orë, diçka që qeveria jonë duhet ta kishte bërë realitet prej kohësh.
Jemi në 2020-tën dhe në Shqipëri diskutohet ende furnizimi me ujë njësoj si 30 vite më parë e të gjithë e kuptojmë se ku çalon puna. Çdo tender që është hapur nuk ka qenë i mjaftueshëm për shtimin e kapaciteteve në impiante dhe kjo na bën të dyshojmë nëse është punuar apo jo vërtetë në këtë drejtim apo thjesht janë vjedhur disa para.
Përderisa për protestën ka pasur kaq shumë ujë, nuk besojmë se problemi duhet të jetë tek rezervat natyrore, por tek mënyra se si qeveria ka punuar me menaxhimin e tyre.
