Reshjet e shumta të shiut ditën e djeshme shkaktuan përmbytje të shumta në të gjithë territorin e Republikës së Shqipërisë. Vendi është shpallur në gjendje të jashtëzakonshme. Policia ka qenë në gatishmëri duke dhënë informacionet paraprake deri në orët e vona të ditës së enjte. Disa akse të rëndësishme janë të pakalueshme si pasojë e përmbytjeve edhe pas orëve të natës.
Policia bën me dije situatën deri në këto momente. Si pasojë e intensitetit të lartë reshjeve të shiut, aksi rrugor Kardhiq – Gjirokastër kalohet me vështirësi, pasi ka dalë uji në rrugë tek pika e Viroit.
Aksi Fushë Krujë – Laç kalohet me vështirësi pasi përballë lokal Arbëria në Fushë-Krujë ka dalë lumi në rrugë.
Rruga e Ndroqit për në Durrës tani është drejt bllokimit për shkak të ujit që po bllokon rrugën në disa pika.
Të dyja krahët e autostradës Tiranë – Durrës janë të pakalueshme.
Nga Durrësi për të ardhur në Tiranë drejtuesit e mjeteve të qarkullojnë në aksin Durrës – Vorë –Rinas – Laknas – Kamëz. Akset e tjera për momentin janë të kalueshme pa probleme.
