Një ngjarje e rëndë është regjistruar në një familje në Tiranë pak orë pas ndërrimit të viteve. Sipas policisë një person, K.Sh., 34 vjeç ka qëlluar me thikë në qafë kunatin e tij i cili ka ndërruar jetë në spital si pasojë e goditjes së rëndë.
Blutë bëjnë me dije se autori K.Sh., 34 vjeç, i cili ka qenë në gjendje të dehur është vënë në pranga. Ndërkohë dyshohet se gjithçka ka ndodhur pas një konflikti të çastit për motive të dobëta.
Klajdi Shundi, 34 vjeç është i riu që plagosi me thikë kunatin e tij tek rruga “5 maji”, kurse viktima është Vladimir Zvezhda, 42 vjeç, raporton Dosja.al.
Ai shkoi me urgjencë në spital pas plagosjes me thikë në qafë nga Shundi, por për fat të keq nuk mundi dot që të shpëtojë. Shundi u prangos menjëherë nga Policia dhe tashmë pritet zbardhja e rrethanave të sherrit.
Ngjarja e rëndë ndodhi rreth orës 03:45 gjatë ndërrimit të viteve. Shundi ishte i dehur në momentin që qëlloi kunatin e tij me thikë në qafë.
“Plagosi me thikë me pasojë vdekjen kunatin e tij, vihet në pranga nga sherbimet e Policisë autori i dyshuar i ngjarjes. Rreth orës 03:45 të mëngjesit të sotëm, në rrugën “5 Maji” pas një konflikti të çastit, për motive të dobëta shtetasi K.Sh., 34 vjeç, në gjendje të dehur ka goditur me thikë në qafë kunatin e tij shtetasin V.Z., 42 vjeç, i cili si pasojë e plagës së marrë ka ndërruar jetë në spital. Sherbimet e Policisë kanë shkuar menjeherë në vendngjarje ku kanë bërë të mundur identifikimin, kapjen dhe arrestimin e autorit. Nën drejtimin e Prokurorisë vijon puna për zbardhjen e plotë të rrethanave të ngjarjes”, njofton policia.
