Megjithëse pak më parë në media qarkulloi lajmi se tre policët e rrëmbyer nga Serbia në territorin e Kosovës u liruan, lajmi rezultoi i rremë, pasi të liruarit kishin qenë disa qytetarë të thjeshtë të Kosovës. Tre efektivët e policisë ende vazhdojnë të mbahen peng në Beograd.
Teksa shpresojmë që situata të mos përshkallëzojë më tepër dhe policët t’i bashkohen sa më shpejt e shëndoshë e mirë familjeve të tyre, kryeministri Rama vazhdon të qëndrojë i heshtur përpara kësaj padrejtësie për Kosovën.
Për Ramën duket tepër e vështirë të mbajë një qëndrim ndaj Serbisë edhe në këtë rast flagrant, ndërsa i vetmi që reagoi ishte presidenti Begaj, duke pasuar edhe disa reagime të vakta e të vonuara nga ministrja Xhaçka në Kuvend.
Këto reagime nuk i ngjajnë aspak reagimeve pasionante të qeverisë shqiptare kundër veprimeve të Kosovës vetëm tre ditë më parë, kur Rama jo vetëm që e cilësonte Kosovën “fajtore” duke cilësuar kërcënimet e Serbisë thjesht ‘presion’, por anuloi edhe takimin e dy palëve duke i kthyer shpinën.
Fatkeqësisht, qeveritarët tanë reagojnë me patos të madh vetëm kur janë në opozitë, ashtu siç bënte dhe vetë kryeministri Kurti në vitin 2016 për një ngjarje të 2012-ës, për arrestimin e e policëve të Kosovës nga serbët, reagim shumë brutal krahasuar me këtë të fundit, teksa qëndron në pushtet dhe kompleksohet nga qeveria serbe.
“Ja u kanë dhunuar tre policë në Dumnicë. Xhandarmëria serbe ja u ka shtrirë në dushk të malit. Pse asnjëri prej tyre nuk dha intervistë? Si bëhet që asnjëri prej tre policëve që u shtrinë ratë në Dumnicë nuk dha intervistë? Si bëhet që asnjë shok i tyre nuk mori hak?”- shprehej Kurti asokohe, si opozitar.
Pavarësisht kësaj, teksa shpresojmë që situata të qetësohet e të mos ketë përshkallëzime, shpresojmë gjithashtu që përulja e personave që na përfaqësojnë (ashtu si në rastin konkret) të përfundojë një herë e mirë!
