Beyoncé ka performuar për herë të parë disa nga hitet e albumit të saj të ri Cowboy Carter gjatë një shfaqjeje në pushimin e ndeshjes Baltimore Ravens vs. Houston Texans, të cilën e ndoqën mijëra tifozë në NRG Stadium të Hjustonit, më 25 dhjetor. Ajo u ngjit në skenë duke hipur mbi një kalë të bardhë për të performuar këngën “16 Carriages” dhe më pas vazhdoi me “Blackbird”, e shoqëruar nga artistë të njohur të muzikës ‘country’, si Tanner Addlell, Brittany Spencer, Tiera Kennedy dhe Reyna Roberts.
Beyoncé ishte e veshur me një kostum tërësisht të bardhë, që përfshinte një peliçe me pupla dhe një trupore të mbuluar me kristale, duke e bërë paraqitjen e saj mjaft të ndritshme dhe impozante. Performanca përfshiu edhe këngët “Sweet Honey Buckiin’” dhe “Levii’s Jeans”, të kënduara me Shaboozey dhe Post Malone, si dhe disa nga hitet e tjera të albumit, si “Ya Ya”, “Jolene” dhe “My House”.
Një moment shumë i veçantë i koncertit ishte kur vajza e saj, Blue Ivy, iu bashkua për të performuar këngën “Texas Hold’Em”, duke shtuar një emocion të veçantë dhe një lidhje të fortë familjare në këtë shfaqje. Kjo shfaqje është e para e Beyoncé pas publikimit të albumit të saj Cowboy Carter në mars të këtij viti.
