Lidhur me ngjarjen e rëndë që ndodhi në Kavajë, ku një vajzë 14-vjeçare u abuzua seksualisht nga shokët e shkollës, Prokuroria e Durrësit ka thelluar hetimet.
Organi i akuzës ka shtrirë hetimet mbi stafin pedagogjik të shkollës “Rilindja” që frekuentonte 14-vjeçarja si dhe Drejtorinë Arsimore në Kavajë.
Raportohet se e gjitha kjo po zhvillohet për faktin se institucioni arsimor heshti 5 ditë me radhë pasi zbuloi skandalin.
“Hetimet ndaj shkollës janë duke u kryer me përparësi”, ka pohuar një burim i prokurorisë për “BalkanWeb.”
Në vendimin e Gjykatës së Durrësit thuhej se pasi u informua për ngjarjen, mësuesja e thirri nxënësen e mitur, duke i kërkuar t’i fliste për marrëdhënien me një nga djemtë e klasës. Në bisedë, vajza i ka rrëfyer asaj se ishte abuzuar seksualisht nga disa prej djemve të shkollës, të cilët e kërcënonin me publikimin e pamjeve filmike, në të cilat shfaqej duke kryer marrëdhënie me të dashurin e saj.
Pas kësaj, mësuesja thirri nënën e vajzës dhe në prani të drejtoreshës e psikologes së shkollës, i ka treguar gjithçka kishte ndodhur.
Ndërkohë institucioni nuk ndërmori hap tjetër, nuk e denoncoi ngjarjen në polici.
Aktualisht për skandalin e abuzimit të të miturës, janë në pranga 7 persona, ndërsa një tjetër është në kërkim.
