Protesta e studentëve, e cila ka hyrë sot në ditën e tetë, ka marrë një formë tjetër.
Studentët kanë vendosur që këtë të mërkurë të protesojnë me libra dhe fletë të bardha.
Ata kanë nisur marshimin pas një jave protestash, në heshtje dhe me veprat e Kamy dhe Ismail Kadaresë në duar.
Disa nga librat që studentët kanë përzgjedhur janë: “Hasta la vista” e Petro Markos, “Të mjerët” e Hugos, “I Huaji” Kamy, “Pallati i ëndrrave” Ismail Kadare.
“I kemi marrë për të treguar se ne lexojmë dhe nëpërmjet leximit mund të ndryshojmë vendin tonë”, u shpreh një studente.
Një pjesë e studentëve janë vendosur pranë Ministrisë së Arsimit, ndërsa pjesa tjetër po proteston para Kryeministrisë.
Kërkesat e tyre mbeten të njëjta, plotësimi i 8 pikave të listuara prej ditësh.
8 kërkesat e studentëve:
1. Rritja e buxhetit në 5% e GDB me qëllim mundësimin e përgjysmimit të tarifës së studimit për çdo nivel studimi, përmirësim e mësimdhënies dhe infrastrukturës (universitete dhe konvikte).
2.Transparence me buxhetin nga ministria e Arsimit dhe IAL-ve, publikimi të gjitha shpenzimeve online
3.Rritja nga 10% në 50% e peshës totale të votës së studentëve për të zgjedhur kandidatët për dekanë, rektorë dhe cdo fakultet të ketë një përfaqësues të studentëve në senatin akademik.
4. Rishikimi i titujve akademikë dhe verifikimi i plagjiaturave të doktoraturave dhe teksteve mësimore.
5.Mbështetur në nenin 99 mbi Këshillat Studentore, ligji i arsimit të lartë, pika 2 kërkojmë që bordi i administrimit të IAL-eve të ketë numër të barabartë votash si nga MAS dhe IAL-t si edhe të shtohet një përfaqësues në këtë bord nga studentët.
6.Pajisja e të gjithë studentëve me kartën e studentit brenda vitit akademik 2018-19
7.Ndërtimi i bibliotekave me starndarde europiane dhe me libër universitar online, falas për studentët në gjuhën shqipe.
8.Vlerësimi i performancës në mësimdhënie dhe kërkim shkencor i pedagogut, publikimi i tij online dhe regjistrimi i leksioneve.
