Një autobus me gazetarë e artistë nga Kosova është ndaluar sot në kufi me Serbinë.
Ata po planifikonin të merrnin pjesë në festivalin që mbahet çdo vit në Serbi, “Mirëdita, Dobar Dan”.
Por artistët janë ndaluar në kufi, dhe janë kontrolluar imtësisht, për të parë nëse kishin me vete simbole të shtetit të Kosovës..
Kjo ngjarje është dënuar ashpër nga kryediplomati kosovar, Behgjet Pacolli përmes një postimi në Twitter.
Sipas Pacollit, mentaliteti i serbëve është njësoj si në vitet ’90-të.
“Dënoj ashpër sjelljen e policisë kufitare serbe ndaj pjesëmarrësve nga Kosova për “Mirëdita, Dobar dan”, aktivitet ky që kërkon pajtimin mes dy vendeve. Është i njëjti mentalitet dhe sjellje e policisë serbe si në vitet e 90-ta”, ka shkruar Pacolli në Twitter.
Edhe vitin e kaluar artistë nga Kosova u ndaluan në kufi dhe nuk u lanë të merrnin pjesë në të njëjtin festival.
Fesitvali “Mirëdita, Dobar dan!” organizohet në Beograd nga Integra (Kosovë), Nisma e të Rinjve për të Drejtat e Njeriut (Serbi), dhe Iniciativa Qytetare (Serbi), me mbështetjen e Fondacionit Kosovar për Shoqëri të Hapur (KFOS), Fondacioni për Shoqëri të Hapur në Serbi, Rockefeller Brothers Fund (RBF), Ministria e Kulturës, Rinisë dhe Sportit e Republikës së Kosovës.
