iconstyle.al > Aktualitet > Për ju që s’po kuptoni më asgjë, ja çfarë duhet të dini për debatin mbi prishjen e Teatrit Kombëtar

Për ju që s’po kuptoni më asgjë, ja çfarë duhet të dini për debatin mbi prishjen e Teatrit Kombëtar

Kushdo që ka qenë të paktën një herë përgjatë viteve të fundit në ambientet e Teatrit Kombëtar, me siguri na kupton fare mirë kur themi se thirrja “Eja në teatër” tingëllon më shumë si “Eja në spital”. Që nga i ftohti i tmerrshëm i muajve të dimrit, tek infrastruktura e marrë fund e skenës ku edhe vetë aktorët kanë frikë të ngjiten, teatri i famshëm i ndërtuar nga italianët në vitin 1939 është duke dhënë shpirt,e megjithatë, duket se do të vijojë të jetë edhe për disa kohë në agoni. Prej një kohe të gjatë, diskutimet për një teatër të ri janë përfshirë nga debate të zjarrta mes aktorëve, qeverisë, opozitës e kushedi kujt tjetër, që duket se thjesht do ta vonojnë më shumë atë që të gjithë në fakt e presin prej vitesh: Një teatër të denjë!

Nga njëra anë qëndron qeveria dhe një pjesë e artistëve që janë pro prishjes së teatrit për të ndërtuar një të ri. Por këtu qëndron dhe kleçka. Sipas kryetarit të Bashkisë, Erion Veliaj, shteti shqiptar nuk e përballon dot shumën prej 30 milionë eurosh të kërkuar për ndërtimin e një teatri modern të standarteve bashkëkohore, ndaj është parë i arsyeshëm një partneritet publik-privat (PPP) dhe në këtë kuadër, pritet që pranë teatrit të ndërtohet edhe një kullë (ose disa).

Kryebashkiaku i Tiranës, Erion Veliaj gjatë dëgjesës me artistët shqiptarë

Siç theksoi pak kohë më parë Veliaj, godina e teatrit, sipas këtij projekti, do të jetë më vete dhe kulla apo çdo gjë tjetër që do të ndërtohet pranë dhe që do të shfrytëzohet për qëllime biznesi, do të ndërtohet në pronat që Bashkia e Tiranës ka ofruar pikërisht për këtë kompromis. Ç’ti bësh që këto prona përkojnë pakëz në qendrën historike të Tiranës…

Ndërkohë, pala tjetër e debatit, ku përfshihet një tjetër grup aktorësh si dhe opozita, është kundër ndërtimit të një teatri të ri, duke arsyetuar se me prishjen e godinës së Teatrit Kombëtar, e gjithë Shqipëria humb një trashëgimi të vyer kulturore. Opozita gjithashtu ka akuzuar qeverinë për tjetërsim të ligjeve me qëllim favorizimin e kompanisë që do të marrë përsipër projektin, e cila pritet të përfitojë edhe truallin pranë Teatrit Kombëtar, në qendrën historike të kryeqytetit, për të ndërtuar kullën e shumëpërfolur.

Por teksa debati ka degjeneruar keqazi në ditët e fundit deri dhe në ofendime mes artistëve që së fundmi kanë marrë përsipër të jenë dhe ekonomistë dhe arkitektë dhe inxhinierë, për këtë çështje kanë folur edhe ekspertët. Shoqata e Arkitektëve të Shqipërisë, nëpërmjet një deklarate ka shprehur se është kundër prishjes së godinës së Teatrit Kombëtar dhe ashtu si një pjesë e madhe e artistëve që protestojnë për këtë çështje, ka propozuar rikonstruktimin dhe restaurimin e godinës dhe ndërtimin e një teatri të dytë modern nëpërmjet partneritetit publik privat në një zonë më të përshtatshme, siç është Bulevardi i Ri.

Nuk janë emaile të mërzitshme!

Regjistrohu për të zbuluar të vërtetat e të famshmëve dhe trendet e momentit.