Pak orë pasi Partia Demokratike e akuzoi kryeministrin Edi Rama dhe ministren e Shëndetësisë, Ogerta Manastirliu për maskat e skaduara, kreu i qeverisë ka dalë vetë me maskë në fytyrë!
Në një konferencë për shtyp për situatën e Koronavirusit dhe për t’iu përgjigjur akuzave të PD-së, Rama u shfaq me maskë në fytyrë dhe kërkoi të mos përhapet panik!
“Këto janë maska që përdoren gjërësisht pas datës së skandancës jashtë sallave kirurgjikale. Në salla nuk janë të rrezikshme por nuk e kanë të gjithë efektshmërinë e tyre. Maskat e zëvëndësojnë facoletën apo garezat për vetëmbrojtje në kontaktin gjatë një gjendjeje të caktuar. As më shumë dhe as më pak, të thuash që janë të skaduar, do të thotë të përhapësh panik”.
Kreu i qeverisë tha se nëse këto maska do të ishin të rrezikshme dhe nëse skadenca e tyre do të implikonte eficencën në sallat kirurgjikale ku operohen njerëz, këto maska nuk do të dilnin dot nga kufijtë e Kanadasë dhe nuk do përshkonin oqeanin për të ardhur në Shqipëri.
“Janë maska që kanë ardhur në Shqipëri si dhuratë nga një fondacion nga Kanadaja, janë ndaluar në doganën e Durrësit për shkak se siç dihet në Shqipëri ka pasur një regjim doganor edhe për materialet apo dhuratat me natyrë humanitare. Ishin të destinuara për një shoqatë bamirësie e cila, mbas thirrjeve të përsëritura nuk u paraqit të paguante detyrimet e shtetit dhe të tërhiqte këto pako që janë prodhim amerikan”, u shpreh ai.
/Iconstyle.al
